Prezidente KSTL, Almeiro Vila Nova hatete, desizaun kona-ba saláriu mínimu asina tiha ona iha 16 Abril liuhusi Konsellu Nasionál Traballu (KNT), ne’ebé involve parte tolu: reprezentante traballador, Governu liuhusi SEFOPE no reprezentante empregador husi CCI-TL.
“Horseik deliberasaun kona-ba salariu mínimu ne'e sai ona. Montante salariu minimu ne'ebé parte tolu aseita ne'e $160 dollar," dehan Almeiro iha Palasiu Governu, Sesta (17/04).
Nia esplika, proposta ne’e hatama ona ba Ministériu Koordenadór Asuntu Ekonómiku (MKAE) no kopia ba lideransa Governu sira inklui Primeiru-Ministru.
Montante $160 ne’e hetan ona konsensu husi parte tolu, nune’e KSTL konsidera katak laiha tan obstákulu boot ba aprovasaun.
"Ami espera katak iha tempu badak nia laran molok tama ba iha loron Mundiál Traballu ne'ebé monu iha 01 de Maiu ne'e Konsellu Ministrus bele halo aprovasaun revizaun ba montante saláriu mínimu ne'e, nu'udar prezente furak ida ba traballador iha Timor-Leste," dehan nia.
KSTL mos husu Governu atu aselera prosesu administrativu atu proposta ne’e bele tama ajenda reuniaun Konsellu Ministru iha 22 Abril.
"Ami husu aselera nia prosesu, nune'e iha reuniaun Konsellu Ministru tuir mai, ita espera iha dia 22 Abríl, bele tama ajenda Konsellu Ministrus,” katak nia.
Tuir Almeiro, aumentu saláriu mínimu la’ós de’it kona-ba hasa’e rendimentu, maibé atu halo ajustamentu ho situasaun inflasaun ne’ebé aas no presu sasan iha merkadu ne’ebé kontinua sa’e.
Nia hatutan, medida ida ne’e importante tebes atu proteje trabalhador sira ne’ebé vulneravel, liu-liu sira ne’ebé seidauk simu saláriu aas no oras ne’e hetan de’it $115.
“Kuandu Governu la konsege aprova molok loron Mundiál Traballu ne'e KSTL sente triste tebes, tanba objetivu husi saláriu mínimu ne'e atu fó protesaun ba traballador ne'ebé vulneravel.”
Nia mós informa, nessesariu ba Governu atu aprova, tanba haree mós ba inflasaun boot tebes, sátan funu iha médiu oriente ne'ebá ne'e fó impaktu tebes ba folin sasan iha merkadu ne'ebé presiza ajustamentu saláriu.
"Ita kuandu ko'alia kona ba saláriu sa'e ne'e Imposivel, ita halo ajustamentu de'it, tanba inflasaun ita nia saláriu ne'e atu dehan iha balansu inflasaun ne'e difísil, tanba ne'e maka ida ne'e ita halo ajustamentu ho ita nia komesa riil para atu bele hakman traballu sira nian moris no situsaun ekonomia iha rai laran", nia hakotu.
KSTL fiar katak Governu bele foti desizaun lalais tanba proposta saláriu mínimu ne’e hetan ona apoiu husi parte hotu. Organizasaun ne’e kontinua halo advokasia atu garante trabalhador sira hetan proteksaun no kondisaun moris ne’ebé di’ak liu tan.