Prezidente  Konselu Kurador Fundasaun Anur Dili, Abdula Bim Said  Sagran hatete, selebrasaun loron idul fitri tinan ne'e komunidade muzulmanu Timor-Leste kontinua fortalese solidariedade, páz no toleránsia relijiaun.

“Ohin loron hanesan idul fitri ne'ebe komunidade musulmanu sira selebra depois sira halo jejun durante fulan ida. Ho  objetivu atu hamos ita nia klamar iha mundu, nune’e ita bele halo buat barak iha ita nia komunidade no ba nasaun Timor-Leste,” Katak nia ba jornalista sira, iha Mejid Anur, Kampung Alór, Sexta (20/03).

Nia apela ba komunidade Muzulmu iha Timor-Leste atu mantein ho (Taqwe Fé Ramadan), hanesan modalidade ida, atu kontribui di'ak ba família no nasaun doben Timor-Leste.

Abdula Bim subliña, Komunidade relijiaun  seluk mos durante ramadan servisu hamutuk ho di'ak nune'e la iha intimidasaun ba malu.

“Ba oin ita kontinua kaer liman hamutuk hodi lori nasaun ba oin ho prósperu, paz no hakmatek la’ós de'it iha ne'e,  maibé ba mos  mundu seluk, ida ne'e mak ita nia objetivu,” Nia dehan.

Prezidente  Konsellu Kurador ne'e hatutan, tuir estatistika Timor-Leste 98 porsentu Katólika no Muzulmanu minoritas.

“Maibe ita hamutuk katak nasaun,Timor-Leste nia sidadaun 100 porsentu ema hotu-hotu fiar nain,” Kata nia.

Dadaun nia dehan, kona-ba toleránsia iha Timor-Leste desde uluk, nunka iha konflitu tanba relijiaun.

“Ida ne'e signifika katak ita moris hamutuk ho toleránsia di'ak tebes. Entaun  ita presiza fortalesa ita nia solidariedade, toleráásia no harmonia iha rai laran,” Abdula tenik.

Purtantu iha sorin seluk, Embaixadór Indonézia iha Timor-Leste, Okto Dorinus Manik, informa  idul fitri ihanesan loron vitória ba muzulmanu sira.

“Ha'u dezeja feliz Idul Fitri 1447 Hijri. Ami hato’o ami nia deskulpa sinseru ba sidadaun Indonézia tomak, no mós ba sidadaun Muzulmanu Timor-Leste iha Dili no área sira ne’ebé hale’u,” Nia reforsa.

Nia hatutan, momentu ne'e  espesiál tebes, tanba idul fitri tinan ne'e, iha semana hirak liu-bá  selebra ona loron Nyepi, tuir kedas ho Tinan Foun Xinés, no daudaun ne’e sarani Katólika sira iha hela períodu jejún.

“Aleinde ne'e ami nia Idul Fitri ba dala lima no ikus iha Timor-Leste. Loron balu tuir mai, ami sei fila fali ba Indonézia no kontinua ami-nia knaar foun iha Papua-Nova Guiné,” Katak nia.

Nia subliña, ida mak  sentidu hosi halibur ohin nian atu konkretiza situasaun saida de’it mak akontese.

“Ha’u hakarak hato’o espesifikamente katak, kondisaun iha fulan hirak liu bá ladún di’ak. Durante loron 20 resin, konflitu mosu iha Médiu Oriente, no ida ne'e sai kestaun ida ne'ebé preokupa ita hotu, maibe Ita tenke hasoru situasaun ekonomia ne’e hamutuk. Ita tenke forte, fó liman ba malu, tulun malu, suporta malu, no reza ba malu,” Diploma ne'e akresenta.

Ba situasaun ne'e, Embaixadór ne'e apela ba  sidadaun Indonézia tomak iha Timor-Leste, atu  hamutuk nafatin hodi hasoru dezafiu hotu-hotu.

“Ita mós tenke haburas hamutuk ho povu Timor-Leste, tanba ita hotu mesak maun-alin,  Ita hela iha rejiaun ida deʼit, tan neʼe ita presiza ajuda malu. Bainhira ema ida hetan difikuldade, ita hotu sente ida-ne'e, no bainhira ema ida kontente, ita mós haksolok,” Nia afirma.

Aleinde ne'e mos, komunidade muzulmanu Afonso Lopes, kongratula komunidade muzulmanu Timor-leste ne'ebe selebra loron idul fitri.

“Espera iha loron idul fitri ita hotu kontinua kria páz, estabilidade no kontinua fortalese solidariedade no toleránsia entre relijiaun hodi kontribui ba dezenvolvimentu Timor-Leste,” Nia reforsa.

Iha okaziaun ne'e, komunidade musulmanu, Tari Lestari, subliña tinan ne'e hanesan tinan daruak ba nia halo jejún iha Timor-Leste.

“Ida ne'e maka ha'u nia jejún daruak iha ne'e, ida ne'e sente diferente tebes, diferente tanba ita iha minoria. Entaun, prosesu jejun ne'e difisil uitoan, ita toman ona iha ambiente ne’ebé ema barak mak halo jejun, maibé iha ne’e la’ós ema hotu mak halo jejún. Entaun, ita tenke halo esforsu liu tan atu halo jejún,” Nia hakotu