Prezidente Komisaun D, ​​Deputadu Ricardo Baptista hatete, prosesu audiénsia ho parte oinoin la’o hela hodi esplora proposta sira iha Projetu Lei Nú.12/VI (3ª).

“Ami halo ona audensia ho parte Ministeriu Finansas no Banku Sentral, mós konfisoens relizoju ho sosiedade sivíl sira hodi rona sira-nia hanoin,” dehan nia iha Parlamentu Nasionál, Kinta (26/03).

Tuir nia, proposta alterasaun ne’e la toka ba aspetu fundamentál sira Lei Fundu Petrolíferu nian, maibé foka liu ba ezisténsia KKFP nian, inklui nia estrutura membru no administrasaun.

Parte balun konsidera KKFP la efetivu no la efisiente iha nia utilizasaun orsamentu.Prezensa membru sira nian iha enkontru konsidera la konsistente, nune’e hamosu ideia atu halakon instituisaun refere.

“Husi proposta ne’e hatete katak hakarak halakon tiha Konsellu Konsultivu Fundu Petrolifeiru ne’e. Proposta ne’e mai par halakon, depois de ami rona tiha lai, ami seidauk foti konkluzaun ida loloos oinsa. Iha diskusaun espesialidade ne’e mak hanoin atu halakon duni ka lae, entaun ami sei kontinua iha audensia ne’e, ami sei rona tan lai,” nia dehan.

Nia hatutan, se karik hasai, artigu lubuk ida iha lei ne’e—hahú husi Artigu 24 to’o Artigu 46—ne’ebé regula KKFP sei revoga.

Entretantu, La'o Hamutuk hato'o apresiasaun ba prosesu konsulta públika Parlamentu nian.Maibé, sira fiar katak halakon KKFP la’ós solusaun ne’ebé loos.

Iha nia deklarasaun, La'o Hamutuk subliña katak desizaun ne'e la'ós de'it kestaun reestruturasaun administrativa, maibé kona-ba balansu podér iha jestaun Fundu Petrolíferu nu'udar rekursu estratéjiku Estadu nian.

“Maske ami aseita katak KKFP iha frakeza sira atu haforsa interese públiku tuir filozofia husi lei, ida ne’e, bele hadia husi reforma institusionálne’ebé efetivu liu,” dehan LH liu husi komunikadu imprensa ne’ebé Jornal INDEPENDENTE asesu, Kinta (26/03).

Organizasaun ne'e alerta mós katak halakon KKFP la ho mekanizmu substituisaun ida ne'ebé maka'as bele aumenta konsentrasaun podér nian no hamenus fiskalizasaun independente ba jestaun fundu sira Estadu nian.

La'o Hamutuk rekomenda avaliasaun independente ida, reforma institusionál, no hametin transparénsia no responsabilizasaun hodi garante katak jestaun Fundu Petrolíferu nafatin iha interese públiku.