Komisariu ne’e dehan, dala-barak presaun politika ne’e mosu de’it iha media.Hanesan iha tinan kotuk bainhira Prezidente Repúblika, José Ramos Horta, deklara katak KAK kaer ema arbiru.
“Presaun politik ne’e ha’u hanoin hanesan tinan kotuk ita-nia nai Prezidente (Repúblika) dehan ‘KAK ne’e ba kaer ema arbiru de’it.Halo buska, aprensaun ema seidauk sala, mais naran kaer hotu ema sira ne’e.KAK ne’e boot liu fali Prezidente, boot liu fali Primeiru Ministru, no boot liu fali Parlamentu’,” dehan Rui ba jornalista sira, iha knaar fatin, Farol, Kuarta (21/01).
Maske nune’e, tuir nia, presaun politika sira ne’e la’os ho intensaun atu hamate vontade servisu KAK nian, maibéfó hanoin ka kurize oinsa mak ba oin KAK bele hadia di’ak liu tan servisu sira, liu-liu ba asuntu kombate korupsaun.
“Buat sira ne’e ba ami konsidera hanesan statement ne’e mós hanesan presaun ida, mais presaun ida ne’e la’os atu hamate ami-nia vontade servisu, presaun sira husi ita-nia na’i ulun sira, ema politiku sira ne’e sasukat ida mai ami, hamanas ami par bele servisu di’ak liu,” nia hatutan.
Komisariu hatete tan, presaun politika barak, inklui husi Prezidente Republika, mosu de’it liu husi deklarasaun publiku ka media, laos intervensaun direita ba prosesu investigasaun.
“Presaun politika hodi halo intervensaun ba iha prosesu ne’e laiha, maibé so deklarasaun sira de’it ne’ebé kestiona servisu KAK nian,” nia afirma.
Liu tan, Rui hatete, KAK laos simu de’it presaun husi parte politika maibé mós husi sosiedade sivil ne’ebé hato’o iha media katak tinan barak ona maibé KAK seidauk lori ema ida ba kadeia.
Molok ne’e, Komisariu Komisaun Anti Korrupsaun, Rui Pereira dos Santos hatete, KAK hetan presaun husi politiku nain sira, maibé presaun ne’e sei la deminui espiritu servisu KAK nian iha luta prevene no kombate korrupsaun, tuir lei númeru 7/2020, Medidas Prevensaun no Kombate Korrupsaun.
Komisariu Rui hato’o kestaun ne’e, iha 09 Janeiru 2025, iha serimonia natal hamutuk entre investigador KAK nian, iha edifisiu sentral Farol, Dili.
Komisariu Rui husu ba investigador sira atu halao servisu tuir regras no prosedimentu investigasaun nian ho profisional, no husik Komisariu KAK ho nia adjuntu sira mak hasoru presaun politika.
“Hanesan ha'u hatete fila-fila ona katak imi nain hira halao servisu ho profissional de’it. Husik presaun politika ne’e Komisariu ho Komisariu Adjuntu sira mak hatan. Importante imi halo tuir regras no prosedimentus sira, ita [kontinua] la’o nafatin", dehan Rui iha ninian intervensaun ne’ebé Jornal INDEPENDENTE asesu, Kuarta (14/01).