Tuir nia, eskoltu (seguransa pesoál) tenke mai husi prosesu formasaun ofisiál no treinamentu espesial iha Unidade Espesial Polísia (UEP), la’ós hili rasik husi membru Governu.

“Ida hili tuir nia família ne'e la eziste.Ha'u-nia mandatu, governu laiha intervensaun iha PNTL, ha'u mak Komandante, ha'u mak deside, ida ne'e mak loos.Membru Governu bele propoin mais deside ne'e ha'u mak deside, laosmembru governu," dehan Afonso, iha Komando UEP, BairoPite, Segunda (30/03).

Durante ne’e, tuir nia, iha duni pedidu husi membru Governu liuhusi Ministériu Interior atu hili rasik sira-nia eskoltu, maibé iha nia mandatu ne’e, nia sei la autoriza.

Tanba, tuir nia, independénsia instituisaun polísia importante atu garante profesionalizmu no seguransa.

Iha fatin hanesan, Komandante Unidade Espesial Polísia (UEP), Superintendente Xefe Damião da Silva Correia, klarifika katak iha duni pedidu husi autoridade balun atu koloka ema ne’ebé sira rasik hili.

"Balun sira mensiona kedas nia identidade kompletu.Mais ne'e ita tenke fó formasaun ba sira, tanba bainhira membru UEP liu-liu CorpoSegurançaPesoal ne'e treinadu, preparadu, entaun sira ne'e prontu par fó apoiu seguransa ba altu entidade.Se o hili husi kontinente jerál OPS mak mai seguransa (mós) di'ak, maibé nia laiha koñesimentu kona-ba seguransa ba altu entidade," nia esplika.

Tanba, nia hatutan, funsaun husi eskoltu mak atu asegura seguransa fízika membru governu sira husi ameasa hotu-hotu.

Fó protesaun durante membru governu hala'o sira-nia knaar, tantu iha gabinete, sorumutu Konsellu Ministru, ka iha viajen ofisiál sira.

Tan ne’e, Komandante ne’e hatutan, eskoltu sira tenke profisionál hodi salvaguarda integridade setór seguransa no konfiansa públiku, no akompañaMG hodi garante katak movimentu ezekutivu nian la'o ho seguru.

Entretantu totál membru UEP hamutuk 700 resin, husi númeru ne'e na’in 285 mak fo seguransa ba MG sira.