Vise Ministru Asunto Parlamentares, Aderito Hugo da Costa hateten, tinan ne'e komemora masakre santa kruz, akontesimentu ida ne’ebé akontese tinan naruk no istoriku tebes ba Timor-Leste nia luta ba ukun rasik-aan hasoru invazaun indonezia.

“Akontesimentu masakre sira ne'e barak tebes, akontese antes 12 Novembru, tanba ne'e aktus ida joven sira hamutuk ho eroi sira hatudu, ne'e merese sai momentu reflesaun hodi memoriza fali aktu eroi sira nian ne'ebé mate ona no mós sira ne'ebé sei moris hela”, dehan nia ba jornalista sira, iha Salaun CNC Balide Dili, Tersa (11/11/25).

Nia haktuir, eroi sira luta maka ohin loron Timor-Leste sai nasaun soberania, independente, livre no demokratiku.

“Esperitu joventude 12 Novembru sira nian motiva ita atu la’o tuir dalan los, tanba sira-nia mehi atu hetan independente, livre no demokratiku,”tenik Vise Ministru Asuntu Parlamentares.

Tanba ne'e, tinan ne'e, momentu selebrasaun 12 Novembru ba tinan 34 husi Centru Nasional Chega.IP hanesan insituisaun estadu ho kompotensia tomak atu prezerva prense pakote selebrasaun aban no seminariu nasional ida hodi lori fali autor sira 12 Novembru nian hodi mai kontra istoria tempu uluk nian.

"Valor sira ne'e importante atu halo reflesaun iha momentu ida kuandu ita selebra. Ohin ita hanesan estudu soberano ukun-aan tinan 23 hanesan momentu istoriku ida halo reflesaun no memoriza serve atu hodi motiva ita", nia esplika.

Nia hatutan, sentidu hosi selebrasaun loron 12 Novembru tinan ne'e kaer ba vontade joventude sira nian iha tempu ne'eba hodi lidera nasaun ne'e hodi bele hadok ita husi hanoin sira ne'ebé destroi instabilidade politika no sai sosiedade livre ho responsabilidade.

Entretantu, iha biban ne’e, Vise Ministru Asuntu Parlamentares mós husu ba joventude sira agora tenki kontinua unidade, hodi kontribui ba Timor-Leste nia dezenvolvimentu, tanba joventude sira uluk iha unidade hasoru inimigu hodi hetan independensia.