Komemorasaun ne’e, ho tema “Unidade iha Diversidade ho Sentidu Nasun nian”, Xefe Estadu fó omenajen solene ba mártir no erói sira husi funu libertasaun durante tinan 24.

Prezidente emfatiza katak veteranus sira reprezenta kapitál morál ne’ebé labele kompara, tanba sira-nia disiplina, organizasaun no fiar ne’ebé metin nafatin sai hanesan baze ba identidade nasionál no estabilidade Timor-Leste nian.

Iha ninia diskursu Estadu nian, Prezidente Ramos-Horta foti kestaun kona-ba tranzisaun husi kampu batalla ba “Funu ba Dezenvolvimentu”, hodi nota katak unidade hanesan ne’ebé uza hodi hetan independénsia, agora presiza fali ba integrasaun ASEAN no soberania ekonómika.

Prezidente mós louva kapasidade transformadora husi veteranus sira, liuliu temi kona-ba “Banku Ita-nia Futuru” nu’udar símbolu mudansa husi rezisténsia armada ba investimentu ekonómiku.

Xefe Estadu husu ba foin-sa’e sira atu aprende husi dedikasaun inan-aman sira-nian hodi hasoru dezafiu modernu sira hanesan inseguransa ai-han, malnutrisaun no pobreza multidimensionál.

Hodi reafirma Estadu nia kompromisu atu garante justisa no dignidade ba kombatante hotu, Prezidente husu koizaun nasionál foun hodi foti povu Timor-Leste ba prosperidade ne’ebé sustentável. Hodi foti kestaun kona-ba mudansa iha misaun istórika nasaun nian,

“Se funu dahuluk nian mak ba liberdade polítika, agora-ne’e ba liberdade ekonómika, dignidade sosiál no povu hotu nia moris-di’ak.” Dehan Prezidente Repúblika, José Ramos Horta, liu husi komunikadu ne’ebé Media INDEPENDENTE asesu husi Média PR, Tersa (03/03).

Prezidente Ramos-Horta taka ninia diskursu hodi fó hanoin ba nasaun katak veteranus sira kontinua sai nu’udar guarda ba memória istórika no pilar fundamentál ba nasaun nia futuru.