Xefe Bankada PLP ne’e hatete, mosu deskontentamentu husi veteranu balun ba koa subsidiu ne’e tanba laiha sosializasaun ne’ebé adekuadu.

“Ita hotu hatene katak veteranus sira kada fulan koa osan subsidu $30 dollar. Ema ida-rua halo deskontentamentu ba desizaun ne'e tanba sira rasik rekoñese la hatene kona-ba desizaun ida ne’e," dehan Angelina iha PN, Tersa (18/11).

Deputada ne’e mós husu kona-ba Banco do Nosso Futuru (BNF) ne’ebé molok ne’e hatete sai nu’udar razaun koa osan $30 kada fulan.

"Tanba Banco do Nosso Futuru harii ona, ba oin sei kontínua koa osan ida ne'e ka lae? tanba harii ona signifika objetivu ida ne'e atinje ona, mais sira kontínua koa nafatin osan $30 dolares signifika sei iha desizaun ruma ne'ebé mak sira hotu tenke hatene.”

“Agora se koa nafatin, Ministériu iha ona desizaun ruma koa to'o bainhira i presiza tan koa to'o montante hirak mak sira bele para? tanba ne'e sira-nia direitu," nia husu.

Ba kestaun ne’e, Ministru Asuntu Kombatentes Libertasaun Nasionál, Gil da Costa esplika, koa subsidiu $30 ne’e hahú ona dezde 2020 nu’udar fundus kontribuisaun atu fó asesu kreditu ba veteranu sira liu husi BNCTL.

"Koa osan depozita iha BNCTL mak hodi fó ba Timor-oan sira, liu-liu veteranus bele kreditu to'o $67 milloes,” dehan nia.

Tuir Gil total osan husi koa subsidiu dezde 2020 to’o ohin loron hamutuk $57.841.299,16.

“Iha regulamentu ne'ebé mak aprova husi Konsellu Administrasaun CCLN hakerek iha ne'ebá dehan osan kontribuisaun iha faze ida primero ne'e to'o $100 milloes mak sira foin halo mudansa,” nia informa.