KM aprova Projetu Dekretu Governu hirak ne'e, relasiona ho Planus Munisipais ba Ordenamentu Territóriu ne'e halo aprezentasaun husi Gastão Francisco de Sousa, ida ne'e hodi define Politika sira hotu.

"Tuir proposta husi Ministru Planeamentu no Investimentu Estratéjiku, aprova ona projetu Dekretu Governu tolu, relasiona ho Planus Munisipais ba Ordenamentu Territóriu Baukau, Vikeke no Lautém nian," dehan Komunikadu ne'ebé Jornalista Independente asesu husi Mídia Gabinete Prezidensiá Konsellu Ministru, Kuarta (12/03).

Tuir komunikadu, planu sira ne’e estabelese estratéjia dezenvolvimentu territoriál lokál, define polítika ordenamentu territoriál munisipál no urbanizmu no garante integrasaun polítika setoriál oin-oin ho impaktu ba territóriu munisipál.

Planu Munisipais ba Ordenamentu Territóriu nian hatudu, iha nivel lokál, matadalan sira ne'ebé estabelese ona iha instrumentus ba planeamentu estratéjiku nasionál, hodi asegura vizaun estruturadu ida ba kresimentu no dezenvolvimentu sustentável munisípiu idak-idak nian.

Entre medidas prinsipais, inklui definisaun ba modelu ordenamentu territoriál munisípiu nian, regulamentu husi okupasaun no utilizasaun rai no jestaun programada husi espasu públiku, hodi permite planeamentu ida ne'ebé efisiente liu no adapta ba nesesidades lokais.