Ministru Prezidensia Konsellu Ministru, Hermenegildo Pereira hateten, objetivu dekretu lei ne'e atu rekoñese no valoriza sakrifísiu husi sira ne’ebé fó sira-nia vida ba independénsia Timor-Leste, hodi garante justisa sosiál ba sira-nia membru família besik ne’ebé esklui husi pensaun ne’ebé prevee iha estatutu kombatente nian.

"Diploma ne’e estabelese montante benefísiu nian ho US$ 10.000, atu fó ba inan-aman sira ka, bainhira sira laiha, ba maun-alin sira hosi martir sira libertasaun nasionál nian", dehan nia, iha Palásiu Governu, horisehik.

Nia dehan, pedidu ba apoiu tenke aprezenta formalmente ba Ministériu Asuntu Kombatente Libertasaun Nasionál (MAKLN), iha koordenasaun ho Konsellu Kombatente Libertasaun Nasionál (CCLN) hodi hatama pedidu no dokumentasaun ne’ebé presiza.

Nia adianta, pagamentu sei halo liuhosi transferénsia bankária diretamente ba konta benefisiáriu nian.

"Apoiu finanseiru dala ida de’it ne’e labele tau hamutuk ho pensaun sira seluk ne’ebé atribui tuir Estatutu Kombatente Libertasaun Nasionál, no karik iha benefisiáriu liu ida, montante ne’e sei fahe hanesan", tenik Hermengildo.