Asisténte matebian José Bernardo, advogada privada Adelina Mello de Araújo hatete, tribunal hasai desizaun ne’e hafoin nia parte halo rekursu kontra desizaun Tribunál Judisial Primeira Instánsia Dili, ne’ebé absolve arguidu na'in tolu husi krime sukestru.

“Tribunál Primeira Instánsia Dili antes ne’e absolve arguidu sira husi krime sukestru, no mantein desizaun anterior prizaun tinan tolu no suspensaun tinan tolu.Maibé depoizde ami halo rekursu ba iha desizaun ne'e, Tribunál Rekursu hasai akordaun hodi aplika pena multa ba arguidu sira tanba faktus provadu katak arguidu sira envolve duni krime sukestru," dehan Adelina ba jornalista sira iha edifisiu tribunal, Sesta (16/01).

Akordaun TR, nia dehan, arguidu Agostinho no Tomás Punef selu multa $400. Enkuantu arguidu Tomás Tavares selu pena multa ho $500.

“Pena multa ne'e ho prazu loron 100. Arguidu Agostinho no Tomas Punef iha obrigasaun selu osan ho valór dollar haat kada loron, ne’ebé to’o loron 100 sira iha obrigasaun selu dólar atus haat. Enkuantu arguidu Tomás Tavares sei selu dollar lima kada loron durante loron atus ida,” nia informa.