Ministru Defeza, Donanciano da Costa ‘Pedro Klamar Fuik’ hateten, loos duni iha fulan-Fevereiru tinan ne’e, Governu liu husi Ministeriu Defeza (MD) hamutuk ho Institutu Nasional Defeza (IDN) inagura ona fatin akademia ne’e.

“Bainhira prosesu selesaun ba kadete sira prontu hotu ona, nune’e mais tarde fulan-Junu primeira aula da akademia militar komesa,” dehan nia, iha Ministeriu Defeza, Fatuhada, horisehik.

Klama Fuik hatutan, aula primeiru akademia ne’e sei komesa ho estudante nain 60 ne’e prioridade uluk ba militar.

“Ne’e ba sira ne’ebe rejime internu, sira ne’ebe hela iha ne’eba no han iha ne’eba no estuda iha ne’eba”,

“Maibe ita mos halo programa ne’ebe bolu ekilibru prioridade ba joven hotu-hotu ne’ebe iha oportunidade estuda siensia militar no seguransa no defeza, maibe la persiza sai militar. Sira mos iha oportunidade partisipa iha kursu abertura equilibriu iha akademia ne’e, nune’e sira bele gradua diploma lisensiatura iha área defeza no seguransa nasional nian,” dehan nia.

Nia fundamenta, kandidatu hotu-hotu ne’ebe sei partisipa aula akademia konjunta militar ne’e mai ho diploma sekundaria

Molok ne’e, Ministériu Defeza, ho lideransa Kontra-Almirante Donaciano Costa ho membrus Governu sira, Membrus Parlamentu Nasional, Prezidente Tribunal Rekursu Afonso Carmona, Xefi Estadu Maior Jeneral F-FDTL, Tenente-Jenerál Domingos Raul “Falur Rate Laek”, Prezidente Autoridade Munisipal Aileu João Bosco, Diretór Interinu Institutu Defeza Nasional (IDN) Nuno Corvelo Sarmento, halo serimónia inagurasaun edifísiu foun Akademia Militar Konjunta (AMK) no lansamentu website ofisiál Instituisaun Universitáriu Defeza Nasional (IUDN).