Jogu finál basketból ekipa mane Angola kontra ekipa mane Cabo Verde, entretantu Ekipa feto Angola kontra Ekipa feto Portugál.

Ínisiu jogu ne'e, Angola domina liu bola, hodi lansa sutu, maibé Portugál koko halo atake agresivu, hodi hadau bola husi adversáriu, nune'e bele lansa sutu, tanba ne'e Angola lansa sutu hodi rekolla uluk pontus 5, maibé ekipa Portugal ho ambisaun halo presaun no buka hadau bola husi Ekipa Angola hodi buka pontu.

Jogu ne'ebé lao ho ritmu aas, ekipa rua hotu-hotu ho esforsu maka’as no mai ho ambisaun hakarak manan jogu, maibe bainhira jogu termina, Portugal rekolla pontu 11,  enkuantu Angola rekola pontu 14.

Husi rezultadu ne’e, Ekipa feto Angola rekolla pontu 14 no Ekipa feto Portugál rekolla de'it pontu 11, tanba ne'e ekipa Portugál tenke simu rezultadu, okupa de'it iha klasikasaun daruak, Ekipa Angola sai manan na'in hodi rekolla osan-mean.

Rezultadu ne'e lori ekipa Mane no Feto husi ekipa Angola, mak rekolla hotu taxa medalla osan-mean.

Kapitaun Basketbol Mane Angola, Alexandre Matola, sente kontente tanba ida ne'e hanesan momentu dahuluk iha nia moris hetan medulla osan mean.

“Ha'u sente kontente no orgullu tebes, ida ne'e hanesan momentu dahuluk iha  ha'u nia moris, tanba  ha’u la hanoin, ha’u sei to’o hanesan ne’e, maibé agradese ba maromak, ami konsege lori osan-mean ba uma (Angola),” Dehan nia ba Jornalista INDEPENDENTE, iha Ginaziu Dili, Sesta (25/07).

Tuir nia, momentu ne'ebé susar liu maka finál ne'ebá hasoru Cabo-Verde, ida-ne'e maka adversáriu ida ne'ebé susar tebes atu manán.

“Ami la hanoin katak ida-ne'e sei susar hanesan ne'e, ami manán Cabo-Verde, maibé sira hanesan adversáriu ida ne'ebé maka'as tebes, sira reziste ami nia atake sira barak, nune'e ita sei serbisu maka'as liután atu ultrapasa sira, nune'e hetan vitória,” Nia informa.

Atleta Angolanu ne'e  reforsa,  sente hanesan onra boot ida, hodi reprezenta nasaun no nia ekipa konsege oferese duni medalla osan-mean ba nasaun Angola.