Responsabilidade Modalidade Jogu Desportivas CPLP, João Kampus hatete, bainhira halo reuniaun urjente ho ekipa haat (4) husi futeból ni’an, Portugál, Cabo-Verde, Angola no Timor-Leste sira hato’o preokupasaun, nune’e komisaun halo mudansa oráriu jogu.

Nia haktuir, alterasaun orariu jogu ne'e hafoin iha konkordansia husi  nasaun 4 kompostu Portugál, Cabo-Verde, Angola no Timor-Leste.

“Alterasaun sira ne'e la’os la iha razaun, maibé ita rona hotu preokupasaun husi ekipa, Portugál, Cabo Verde, Angola no Timor-Leste, tanba jogu sira ne'e kuaze lor-loron de'it, entaun sira la iha tempu atu rekopera, nune'e sira fo alternativu ida atu halo mudansa ba orariu,” Dehan nia, liu husi Konferensia Imprensa, iha Media Senter CCD, segunda (21/07).

Nia dehan, mudansa orariu jogu, hanesan loron ida hala'o jogu, deskansa loron ida foin jogu fali, hahu iha ohin ne'ebé tuir lolos iha jogu ida Timor-Leste kontra Cabo Verde.

“Ita hahú iha ohin, ne'ebé tuir lolos iha jogu ida ekipa Timor-Leste kontra Cabo Verde, maibé ohin iha tiha alterasaun no ohin la iha jogu, ita sei muda fali entre Timor-Leste ho Cabo Verde, sei akontese fali iha loron 22, sei iha  jogu rua,  jogu primeiru entre Timor-leste ho  Cabo Verde sei  Kick of iha 19:00 Otl,  no segundu jogu entre  Portugál ho Angola, sei kick of iha 21:00 Otl,” Nia informa.

Aleinde ne'e, iha loron 23 sei la iha jogu no jogu sei iha fali loron 24, entre Angola no Timor-Leste iha 19:00, depois kontinua kedan Portugál ho Cabo Verde 21:00 Otl.

“Ba faze grupo ita sei remata iha loron 24, nune'e iha loron 24 sei la iha jogu, nune'e jogu sei iha fila fali loron 26 ba jogu 3 klasifikasaun ni’an, no jogu sei halo iha kampu Becora, iha 13:00 otl, enkuantu jogu final sei hala'o iha estadiu Dili iha 16:00 Otl, ida ne'e mak mudansa ba orariu ne'ebé insiu iha tiha ona,” Nia relata.

Iha fatin hanesan, Xefe Delegasaun Portugál, Rui Bragança reforsa, iha mudansa orariu, tanba haree mos ba mudansa viajen nasaun sira seluk ni’an.

“Ami to'o iha konkluzaun katak sei la saudável, katak sei la seguru ba atleta sira atu joga iha loron tui-tuir malu, tanba ne'e ami koko atu muda oráriu  ne'ebé ajenda ona iha termu jogu sira, muda de'it ligasaun sira ba loron ida ka loron seluk, maibé iha de'it loron neen ne'ebé restu, imposivel ba nasaun ida atu repete jogu,” Nia informa.

Tanba, se halo jogu tuir-tuir malu mak sei la seguru ba atleta sira, no sei la sai espetákulu di'ak liu iha desportu.

“Ami sei labele iha ekipa sira ne'ebé kompetitivu, bainhira atleta sira la seguru, entaun solusaun ne'ebé hetan mak iha loron deskansa ida no ekipa rua ne'e kompete iha loron ne'ebé hanesan, nune'e ho  maneira ida-ne'e, ema hotu-hotu iha pozisaun hanesan iha loron deskansa nian, ida-ne'e maka opsaun ne'ebé seguru liu ba atleta sira no ba jogu sira, integridade desportiva sei privileso,  tanba sira hotu bele kompete iha nivel aas liu,” Nia akresenta.