Empreza rua ne’e sei hahú halo produsaun iha inísiu tinan 2027 ho estimasaun millaun 25 kada baril, ne’ebé iha faze dahuluk sei prodús to’o tinan sia no bele kontinua.

“Hasoru Primeiru Ministru hodi atualiza kona-bá ami-nia projetu ne’ebé lokaliza iha Tasi, no sei halo produsaun bá kampu ho naran Kuda Tasi iha tinan 2027. Orgullu tebtebes hasoru Primeiru-Ministru hodi hato’o programa idane’e no iha esperansa bá oin ami-nia kompaña bele servisu hamutuk ho Governu hodi hahú produsaun,” dehan Diretór Ezekutivu Empreza Finder Energy, Damon Neaves, iha Palásiu Governu, Kinta (05/03).

Nia dehan, foin lalais empreza ne’e hamutuk ho parseiru Timor GAP sosa ró ne’ebé sei utiliza bá prosesamentu mina.

Ró ne’e rasik sei iha Europa no sei mai hodi hahú produsaun bá posu mina iha tinan 2027.

Lokalizasaun posu mina Kuda Tasi 100% iha área Timor-Leste ne’ebé sei fó servisu bá Timor-oan sira.Kompaña produtór no traballadór ne’ebé servisu sei selu taxa bá Estadu TL.

“Primeiru Ministru apoia tebtebes projetu ne’ebé iha área eskluzivu TL nian. Estudu halo tiha ona no sei halo produsaun iha 2027,” nia atualiza.

Finder Energy Holdings Limited estabelese iha tinan 2004 ho nia sede iha South Perth, Austrália, nu’udár esploradór mina no gás ne'ebé susesu no provadu.

Finder harii ona karteira área substansiál ida hosi lisensa esplorasaun nian ne'ebé prospetivu tebes iha basia hidrokarbonetu prinsipál rua iha mundu mak hanesan Plataforma Norte Oeste Austrália ho Tasi Norte Reinu Unidu.