Prezidente Repúblika, José Ramos Horta, hato’o diskursu prinsipál ida ne’ebé forte iha Sesaun dala 61 Konsellu Direitus Umanus ONU nian iha Jenebra, hodi defini direitus umanus nu’udar fundamentu ka hun ba sosiadade sira-ne’ebé estável no ekuitativa.

Hanesan Laureadu Nobel ba Pás, Prezidente fó hanoin kona-ba norma internasionál sira-ne’ebé naksobu kauza husi rivalidade jeopolítika no olarizasaun ne’ebé estremu, hodi bazeia ba Timor-Leste nia istória rekonsiliasaun rasik.

PR Horta hato’o apelu maka’as ba perdaun dívida globál ba nasaun sira ne’ebé dezenvolve an hela no husu ba líder mundiál sira atu buka solusaun diplomátika ho fuan ba konflitu sira ne’ebé harahun mundu iha Ukránia, Gaza, no Myanmar, hodi emfatiza katak direitus umanus la bele eziste iha vakuu (mamuk) husi ki’ak no dezigualdade laran.

Bazeia ba Timor-Leste nia istória rekonsiliasaun,  Xefe Estadu enfatiza katak “Timor-Leste nia pas harii hodi rekoñese umanidade husi eis-adversáriu sira duké buka fali vingansa, no nia oferese vizaun foun ida ba pás globál, hodi husu "kompromisu ne’ebé la hamoe parte ida" iha konflitu Ukránia no husu solusaun nasaun rua ne’ebé viável iha Médiu Oriente ne’ebé proteje feto no labarik sira "iha kualkér situasaun",” Dehan PR Horta liu husi Komunikadu ne'ebé Media online INDEPDENTE asesu husi Média Prezidensia Repúblika Demokrátiku Timor-Leste, José Ramos Horta, Tersa (24/02).

Alende, iha li’ur husi sala plenária, Prezidente Repúblika, José Ramos Horta nia ajenda reforsa apelu sira ne’e ba reziliénsia globál liuhusi sorumutu nivel altu ho Altukomisáriu ONU ba Direitus Umanus, Volker Türk, no Direitór Jerál Organizasaun Mundiál Saúde (OMS), doutor Tedros Adhanom Ghebreyesus. Sorumutu sira ne'e, hamutuk ho almosu diplomátiku ne’ebé organiza husi Misaun Permanente Timor-Leste ba reprezentante ASEAN no CPLP sira, foti sai nasaun nia papél nu’udar harii ponte ba mundu.