Dom Virgilio Kardeal,hatete, Dioseze idaidak halo ona avaliasaun ba kondisaun no servisu, hodi bele mellora liu tan atendimentu ne'ebé di'ak ba sarani sira.

" Dioseze idaidak iha nia estrutura ne'ebé iha kompetensia atu avalia oinsá mellora liu tán atendimentu. Bispu sira kontinua hamutuk nafatin hodi enkoraja sanselera sira atu bele fó atendimentu ne'ebé mak di'ak," dehan Kardeal, iha Palásiu Governu, hafoin hasoru malu ho Primeiru Ministru, Kay Rala Xanana Gusmão, Kinta (05/02).

Kardeal rekoñese katak durante tinan hirak nia laran iha fallansu balun iha atendimentu sira iha parokia. Maske nune’e, igreja kontinua esforsu atu hadia.

"Loos duni durante iha tinan hirak nia laran ami haree katak iha kongresu boot ida atu hadi'a, ne'e sempre i sein dúvida, sempre iha fallansu maibé mós iha esforsu atu hadi'a prosesu sira ne'e," katak nia.

Molok ne’e, estudante no sarani husi Parokia Lautém konsidera burokrasia parokia Kristu Rei Laútem la nesesariu no sempre trata sarani sira la dignu, la justu no la seguru.

Portavoz estudante no sarani, Apolinário da Silva informa, regulamentu administrasaun husi Parokia Kristu Rei Laútem ne'ebé la'o kleur ona dala-barak fó prejuiju ba sarani sira, lá'os de’it ba selu ba administrasaun, maibé fó risku mós ba sarani sira-nia vida.

Nia hatete, iha kazu mate iha 27 Janeiru ne’e iha dalan Api Kuru relasiona ho prosesu administrativu Parokia, ne’ebé obriga sarani sira lori karta rekerimentu ba Dioseze Baukau atu muda naran avo nian iha sertidaun batizmu. Iha dalan, vitima sira hetan asidente no lakon vida.

"Ami sarani husi Parokia Kristu Rei de Lautem hakarak kumpre no kontribui nafatin ba regulamentu administrativu sira hotu, maibé to’o ona tempu halo revizaun ba regra sira ne'ebé la nesesariu no sempre fó prejuizu ba sarani sira iha tempu naruk nia laran," dehan Portavoz ne’e iha konferensia imprensa, iha Jardin 5 Maiu, Kolmera, Sabadu (31/01).

Sarani sira husu ba Parokia Kristu Rei Laútem tenke fixa regra sira kona-ba pagamentu nian iha kuadru avizu hodi nune’e bele fasilita sarani sira, no bele evita mós pratika korupsaun no nepotismu.

Sira mós la konkorda ho prazu validasaun sertidaun batizmu ne’ebé limita de’it ba fulan neen ka tinan ida, no husu atu aumenta pelumenus ba tinan tolu ka halakon total, hodi evita sarani sira halo gastus bebeik, liu-liu ba sarani sira iha foho no ho situasaun vulneravel.

“Ami sarani sira nia rekomendasaun ho hanoin pozitivu katak ita hakarak mellora ita-nia sistema administrasaun iha parokia laran hodi nune’e bele fasilita sarani sira no evita risku sira,” dehan nia.