Ministru Justisa, Sergio Hornai dehan, Xefe Estadu bolu hanesan ministru justisa mai ho ekipa atu update informasaun sira relasiona servisu ministériu justisa ninian, liu-liu alargamentu ba terrenu sira ne'ebé pertense ba prezidensia repúblika ninian.
Nia dehan, atu bele fó informasaun sira ba iha prezidente repúblika, nune'e hato'o informasaun balun iha relasionamentu ba polítika governu ninian ba atribuisaun rai ba sidadaun sira, nune'e ba iha arendamentu no mós ba rai sira ne'ebé pertense ba estadu ne'ebé afetadu ba iha dezenvolvimentu husi governu ninian.
"Prezidente Repúblika fó hanoin buat balun ba governu, liu-liu ministériu justisa ninia papél oinsá mak atu haree kona-ba koordenasaun di'ak ho ministériu relevante, tantu ministériu obras públika, ministériu administrasaun estatál, liu-liu polítika urbanizasaun ninian iha Dili no mós iha fatin sira seluk," dehan nia, iha Palásiu Prezidensiál, Bairru-Pité, horisehik.
Nia hatutan, loron ba loron demanda pedidu mai husi sidadaun, servisu emprezáriu sira sempre husu pedidu mai iha ministériu atu halo arendamentu sira, no mós husu konsensaun ka lisensa atu bele uza propriedade estadu ninian.
Nune'e, PR Horta hanesan Xefe Estadu husu ba governu liu-liu iha ministériu responsavel ba iha justisa ninian, iha parte polítika alargamentu oinsá mak atu halo modernizasaun ba sidade buat sira ne'e hotu, entaun ida ne'e faze parte atividade ne'ebé ohin hasoru Prezidente Repúblika.
"Alargamentu husi Prezidensia Repúblika nian kona-ba atividade balun ne'ebé husi Prezidensia Repúblika planeia tiha ona, atu halo haluan tan, ezisténsia koridór Prezidente Repúblika ninian liu-liu ba iha kotuk, sori-sorin. Nune'e konforme polítika ne'ebé define ona husi planu Prezidensia Repúblika ninian, bele halo konektividade ba iha ne'eba," hatete nia.
Nia reforsa, nune'e mós hanoin balun ne'ebé Prezidente Repúblika ne'ebé fó hela ba iha Ministériu Justisa, ida oinsá mak atu haree buat balun ne'ebé Prezidente Repúblika halo tiha ona ho parseiru sira atu halo atividade dezenvolvimentu balun iha Timor.
"Maibé, Timor presiza halo viziversa, troka buat balun rai estadu ninian atu sira bele halo atividade ne'ebé fó ba governu, Abudabhi hakarak fó ba iha Timor hodi halo atividade sira, karik iha ba ita ninia Casa Dormitoriu ba ita ninia estudante sira ba oin, entaun ida ne'e mós sai hanesan prióridade Prezidente Repúblika ninian, halo koordenasaun ida maka'as ho ministériu relevante, liu-liu Terras no Propriedade, nune'e mós ba iha Ministériu Obras Públika atu haree sasan sira ne'e ba iha oin. Se forma possivel ita bele hatan ho urjensia ba iha pedidu sira ne'ebé mai husi ita ninia país amigu sira nian," hakotu nia.
Antes ne’e, Prezidente Repúblika, José Ramos Horta, hala’o reuniaun ho ho Ministru Obras Públika (MOP), Samuel Marçal, hodi husu tuir osan governu nian fó kompensasaun ba populasaun sira ne'ebé hela besik área Prezidensia Repúblika (PR).
Nia dehan, projetu boot ne'ebé oferese husi Abudabhi atu halo iha Balide ba madre sira seidauk iha resposta husi relijiozu Roma, entaun deside halo iha Palásiu Prezidensia nia sorin, rai propriedade Estadu nian.
PR Horta esplika, rai iha Prezidensia Repúblika nia sorin, ba too kotuk ne'e properidade Prezidensia Repúblika nian. Halo ona levantamentu ho populasaun iha ne'eba sira hotu-hotu konkorda, no sira prontu atu muda.
Nia dehan, iha ona lista kompensasaun, osan ne’e MOP garante iha. Entaun se ko'alia ho inan-aman sira iha ne'eba konforme presu halo ona mak sira hotu-hotu kontente, sira simu atu muda.
"Prezidensia Repúblika nia fatin sorin ne'e, rai ne'e kapás liu tan, iha estrada prinsipál, edifisiu ne'e bonitu loos, modernu ne'e atu fó ba oan feto sira ne'ebé idade ba universidade, ba hela iha ne'eba," dehan PR Horta, iha Bebora, Sábadu (10/5).
Nune'e, labele hela iha kos sira, kondisaun aat loos, laiha privasidade, laiha seguransa, laiha ijene.
"Entaun ha'u husu ba liurai boot iha Abudahbi, ha'u-nia kolega di'ak, favór ita boot bele ajuda ka la'e, nia hatete bele, maizumenus tokon US$ 10 atu halo projetu ne'e," hatete PR Horta.
Maibé, buat hotu-hotu prontu, enjeñeiru sira mai dala hira ona, dala tolu mai ona, haree mas laiha solusaun ho problema rai madre sira iha Balide.
Entretantu, Ministru Obras Públika (MOP), Samuel Marçal hatete, Prezidente Repúblika bolu mai reprezenta husi Ministériu Obras Públika no Ministériu Finansas.
Nia dehan, mensajen mak Prezidente Repúblika apresia servisu governu ninian ne'ebé foka liu ba estrada rurál sira iha munisipál sira, Prezidente Repúblika kontente.
Tanba MOP hahú daudaun ona estrada sira ne'ebé bele grave, balun komesa hahú. Prezidente Repúblika husu mós atu aselera servisu sira ne'e bele lalais liu tan hodi responde ba povu nia nesésidade sira iha baze nian.