Diretór Servisu Apoiu Diagnóstiku no Terapeutiku HNGV, Vidal de Jesus Lopes, esplika katak sira ne’ebé hala’o tratamentu iha sala Pediatria 2 ne’ebé bolu sala Rawat Gabung (RG) mak bebé ho kondisaun espesial.

"Inan ne'e alta ona maibé bebé sira ne'ebé mak moris mai ho permatur ou todan ne'ebé mak menus husi estandar, ou bebé sira ne'ebé mak moris mai haan fo'er, iha infeksaun presiza kompleta nia antibiotiku ba loron rua, ou haat no lima, depois fila uma ona," dehan Diretór Servisu Apoiu Diagnóstiku no Terapeutiku iha HNGV Vidal de Jesus Lopes bá Jornalista sira iha nian kna'ar fatin, Kuarta(24/09).

Iha sala ne’e, nia hatete, prepara kama ki'ik-oan ba bebé hamutuk 14, enkuantu ba inan sira tuur hein de'it.

“Agora kondisaun iha ne'ebá ne'e mak Hospitál Nasionál Guido Valadares tenke kria kadeira ida lipat ne'e, inan sira bele sadere uitoan depois fó susu hotu bele maneza tempu bele fila uma.”

Iha ne'ebá, nia dehan kria mós kondisaun breastFeeding nune’e bainhira inan sira atu fila ba uma no mai tarde uitoan bele hois sira-nia susunbeen no pesoal saude sira sei fó ba labarik.

Tuir estandarte, nia dehan, sala RG mak hanesan ne'e katak prepara de’it kondisaun ba labarik no inan sira akompaña de’it.

“Inan ne'e atu ami akompaña de'it, ita la kria kondisaun ba nian inan, só kria kondisaun minimu ne'e mak ita prepara de'it kadeira sadere ne'e," katak nia.

Maske nune’e, tuir nia, parte HNGV sei tuur hamutuk hodi deskuti oinsa mak bele kria kondisaun ba inan sira.

"Ba oin ita presiza karik kondisaun duni. Ami tenta ko'alia hamutuk fali hodi kria kondisaun, mais orsida kondisaun ne'ebé mak ami kria, ami sei tetu atu nune'e labele hamosu fali problema foun iha ospitál ida ne'e.”

“Enprisipiu ita kria kondisaun nafatin ba pasiente ho nia familia atu nune'e sente konfortavel, trata hanesan serumanu no trata ho dignu nune'e karik alta ho di'ak, i psikolosiamente nia ho kondisaun ne'ebé mak di'ak," dehan nia.

Iha fatin hanesan, inan ne’ebé nia foto vira iha media sosial, Apolonia Mendonca agradese tanba ho nia foto ne’e bele fanun parte kompetente hodi tau-matan ba kondisaun sira iha HNGV.

Maske nune’e, inan ne’e lamenta tanba ema hasai nia foto la ho ninia autorizasaun.

Tuir nia, nia hatoba bebe iha rai atu bele fó susu tanba bainhira tuur nia sei sente moras iha fatin ne’ebé mak suku.

"Ami kauze kalan haat ona iha ne’e, ne'ebé kalan haat ne'e tuur la aguenta, entaun ami tenke toba iha rai par fó susu bebé, tanba tuur de'it labele, bainhira ami toba nahe biti ho manta iha rai mak ami fó susu bebé, maibé laos tau langsung bebé, laiha tau sumasu,” nia esplika.

Apolonia hatete, nia oan baixa iha sala RG tanba isin manas, maibé daudauk ne’e ninia kondisaun di’ak uitoan ona.