Vise Direitór Dahuluk Asosiasaun HAK, Antonino de Limas hatete, Aeroportu Komoro ne'e hatama reseita no tuir loloos konstrusaun ne'e tenke aselera ona.
"Ha'u hanoin aselera lalais Aeroportu Internasionál Nicolau Lobato Komoro ne'e mak importante, se ita ko'alia Aeroportu ne'e mak odamatan dahuluk, entaun halo Aeroportu ne'e, labele halo Aeroportu Oekusse ho Suai mais depois iha aspetu negósiu la hetan retornu,” dehan Antonino de Limas ba Jornálista INDEPENDENTE iha nia kna'ar fatin Faról, (18/08).
Nia haktuir, loloos konstrusaun Aeroportu Komoro tenke aselera, nune'e bele hatudu katak, Timor Leste nia Aeroportu ne'e standar internasionál.
Nia hatete, hanoin terminál, haree liu ba fatin parajen ne'e, depois nia dezeñu tama, sai ne'e hanoin presiza atu haree, karik hanoin atu halo rehabilitasaun ka oinsá ne'e bele halo.
Maibé, ezijensia planu ida atu hadia Aeroportu Internasionál Nicolau Lobato Komoro ne'ebé governasaun uluk planu ona atu halo konstrusaun, mais depois la akontese.
Nia reforsa, Aeroportu Komoro ne'e dehan retender mais depois ninia nasib ne'e la'o nusa. Loloos ne'e governu aselera ida ne'e depois terminál sai pakote ida husi projetu ne'e, nune'e labele hatudu pemborosan ne'e.
Nia argumenta, hadia tiha terminál mais depois karik tinan oin mak rehabilitasaun ba Aeroportu ba area sira ne'e kona hotu karik ne'e sei sobu ka oinsá.
Tan ne'e mak planu ne'e tenke integradu ho planu ida ne'ebé konstrusaun Aeroportu atu loke ka estensaun ba Aeroportu ne'e ho ninia medolu ne'ebé dezeñu uluk governasaun anteriór halo, mai depois dehan halo koresaun, halo foun, entaun loloos ida ne'e aselera planu ne'e depois bainhira konstrusaun ne'e la'o, inklui terminál ne'e pakote ida.
Nune'e, labele hanoin tan de'it haree fatin parkiran la to'o ona, mais depois tau osan hadia hotu bainhira projetu ida estensaun ba Aeroportu Komoro ne'e implementa fali depois sobu.
"Ha'u hanoin ba governu ne'e tenke tetu sasan sira ne'e ho di'ak nune'e labele mosu gasta osan estadu ne'e arbiru de'it," hakotu nia.
Antes ne'e, iha loron 14 Maiu 2025, Ministériu Transporte no Komunikasaun, Miguel Manetelu, informa ona iha reuniaun Konsellu Ministru katak iha 20 Maiu halo lansamentu ba primeira pedra ba konstrusaun aeroportu.
Ba konstrusaun aeroportu ne'e, Governu deside ona prosedimentu aprovizionamentu liuhusi prosesu naruk, ne'ebé empreza manán-na'in iha rua mak hanesan PT. Waskita Karya husi Indonézia, liuhusi parseria ho PT Amtyhas mak kaer espansaun pista no infraestrutura ho totál orsamentu millaun $72,5 no jestaun projetu ho verba millaun $6,28.
Alende ne'e empreza husi Japaun ne'ebé konstrui terminál pasajeiru ho orsamentu besik millaun $37,5, ne'ebé verba ne'e prevee husi Governu Timor-Leste no husi povu Japonés.