Tuir Deklarasaun husi Portavos Bankada CNRT, PD, KHUNTO, Deputadu Patrocino Fernandes hatete, desizaun hodi aloka verba orsamentu atu sosa kareta ne’ebé aprova iha Orsamentu Jeral Estadu 2025 nian iha fulan-Novembru liu ba. Ida ne’e baze ba Konstituisaun RDTL ne’ebé fó knaar importante tolu ba Parlamentu Nasional, maka halo lei, halo fiskalizasaun ba aktu governativa no foti deizaun politika ba Estadu no nasaun nian.
Tanba ne’e, desizaun atu sosa tan kareta foun ne’e, atu bele fasilita PN halo nia knar tuir funsionamentu Estadu no tuir estatutu ne’ebé aprova iha primeiru lejislatura ne’ebé deside kona ba direitu no deveres deputadu sira nian.
Ne’ebé define mós deputadu sira hotu tenke iha fasilidade no kondisaun ne’ebé favoravél atu sira bele hala’o sira nia knar ho diak.
Nune’e, bankada CNRT, PD ho KHUNTO haree ba preokupasaun sira hotu kona ba difikuldade sira ne’ebé PN enfrenta durante tempu naruk liga ho transporte nian.
Nia hatutan tan katak, aliened ne’e liga mós ho preokupasaun deputadu na’in 65 iha VII lejislatura nian, kona ba kondisaun kareta.
Nia esplika, husi parte seluk mós sekretariadu PN ne’ebé nuudar jestor administrativu no mós responsavel ba lojistika tomak iha PN, sira nia lamentasaun kona ba nesesidade atu oferese fasilidade ba deputadu sira liliu kona ba meiu transporte ba deputadu sira, presiza atu halo sira nia atividade no mós difikuldade kona ba kustu ba manutensaun ba veikulu sira ne’ebé dadauk ne’e deputadu sira uza, ne’ebé dala barak lori depuadu sira nia vida ba tau iha risku.
Ho nune’e, maka deputadu sira husi bankada tolu CNRT, PD no KHUNTO fó votus 42 ho votu a-favor ba planu orsamentu ne’ebé sekretáriu tékniku PN tau ba iha planu no aprova iha konsellu administrasaun hodi lori ba iha plenaria PN, maka bankada tolu ne’e konsiente no fó aprovasaun a-favor hodi fasilita servisu sira ne’e hotu.
“Maibé bankada tolu ne’e konsiente duni katak, desizaun ne’ebé ami hola kaer deit ba preokupasaun deputadu sira, kaer deit ba preokupasaun sekretariadu PN nian ne’ebé jere PN, maka dala ruma la refleta ba preokupasaun públiku nian no ikus hamosu polemika ne’ebé ita hotu haree. Tanba ne’e tetu ba situasaun sira hotu, Bankada CNRT, PD по KHUNTO deside hodi husu ba Parlamentu Nasional atu kansela prosesu tomak konaba akizaun kareta,”dehan nia liu husi Konferensia Imprensa ne’ebé hala’o sala Bankada CNRT, Parlamentu Nasional, Segunda (15/09/25).
Entretantu, iha sorin seluk, Prezidente Bankada FRETILIN, Aniceto Guterres hatete, tuir lolos bankada Governu iha momentu ne’ebá aseita ho proposta ne’ebé bankada FRETILIN halo, husu atu hasai ka koa osan ba sosa kareta foun ba deputadu sira ho montante milaun $4.2 ho osan viajen ba deputadu sira.
Nune’e, la’ós mosu tiha manifestasaun maka bankada Governu hasai desizaun atu kansela sosa kareta refere.
“Pozisaun bankada FRETILIN nian desde uluk ne’e klaru, ami hakarak hasai ka koa osan ba sosa kareta nian, tanba ita iha prioridade seluk no povu nia neseidade barak maka ita presiza atende no deputadu sira nia previlejiu barak no la presiza sosa tan kareta,”dehan Prezidente Bankada FRETILIN.
Enkuantu, kona ba regalias ba deputadu sira, bankada opozisaun ne’e afirma, regalias ka orsamentu ne’ebé atu diminui ne’e tenke tuir lei.