Rekomendasaun ida ne’e relasiona ho informasaun katak lista kandidatu komandu foun PNTL daudauk iha ona iha bolsu Ministru Interiór, Francisco da Costa Guterres, no planu sei aprejenta ba Konsellu Ministru iha loron 16 Marsu.

Diretór Ezekutivu HABADA, Abel Amaral, hatete katak organizasaun ne’e laiha dúvida ho desizaun atu eskolla figura foun, tanba tempu mos to’o atu muda lideransa.

Maibé, tuir nia, selesaun ne’e tenke tuir dekretu-lei númeru 35/2024 no estatuta PNTL nian.

“Ba HABADA, di’ak liu Ministru Interiór konsidera kandidata fila fali atuál Komisáriu Jerál ho Segundu Komisáriu PNTL, tanba sira de’it mak prienxe kritériu tuir lei atu asume postu Komisáriu Jerál,” dehan Abel Amaral ba jornalista sira iha Komoro, Segunda (09/03).

Tuir nia esplika, tuir artigu 130 númeru 1 iha estatuta PNTL, ema ne’ebé atu promove ba postu Komisáriu Jerál tenke iha mínimu tinan rua iha postu Komisáriu.

Tanba ne’e, tuir observasaun HABADA nian, ofisiál sira ne’ebé agora iha postu Superintendente Xefe seidauk prienxe rekezitu legal atu sai Komisáriu Jerál.

“Superintendente Xefe sira ne’e iha prosesu normal bele promove ba Komisáriu Asistente, maibé atu sai Komisáriu Jerál, tuir lei ida ne’e seidauk iha ne’ebé prienxe rekezitu,” nia esplika.

HABADA espera katak rekomendasaun ne’e bele konsidera husi Ministru Interiór, atu evita nomeasaun ne’ebé bele hamosu polémika iha futuru.

Organizasaun ne’e hatete katak sira la hakarak interven ba servisu ministeriu nian, maibé hanesan instituisaun sosiédade sivil ne’ebé foka ba asuntu seguransa no governasaun, sira sente presiza fó hanoin atu garante prosesu selesaun ne’e tuir lei.

“Se lista kandidatu ne’ebé atu aprezenta la tuir dekretu-lei númeru 35/2024, di’ak liu Ministru Interiór hanoin fila fali atu evita polémika foun,” dehan Abel.

Nia akresenta katak Ministru Interiór sei iha tempu atu halo revizaun ba lista kandidatu antes proposta ne’e aprezenta ofisial ba Konsellu Ministru.