Desizaun ne’e delibera liu husi reuniaun Konsellu Ministrus ne’ebé hala’o iha Palasiu Governu, Dili, Kuarta ne’e (22/10).

“Memorandu Entendimentu ne’e ho objetivu atu hametin kooperasaun bilaterál iha setór telekomunikasoins, ne’ebé kobre infraestrutura, servisus no asuntus regulatórius, bazeia ba resiprosidade no benefísiu mútuu,”dehan Komunikadu ne’ebé Online ne’e sita iha Pajina Governu Timor-Leste, kuarta ne’e.

Nune’e, entre área prinsipál sira kooperasaun nian mak interkámbiu kuiñesimentu tékniku no prátika di'ak, kapasitasaun institusionál, promosaun peskiza no inovasaun teknolójika, no mós fasilitasaun parserias entre entidade reguladora, operadór no ajente sira setór ne’e nian husi nasaun rua ne'e.

Entretantu, akordu ne’e mós prevee programa formasaun, workshop no interkámbiu tékniku, hodi kontribui ba dezenvolvimentu setór telekomunikasaun ne’ebé modernu, seguru no efisíente liu, ne’ebé esensiál ba progresu ekonómiku no prosesu integrasaun rejionál Timor-Leste nian iha espasu ASEAN.