Ministru Prezidénsia Konsellu Ministrus no Portavós Governu nian, Agio Pereira, lori Governu Timor-Leste nia naran, deklara katak  ho laran triste tebes, Governu Timor-Leste simu notisia konabá dezastre aéru iha Ahmedaba. Ema barak mak lakon vida, inklui sidadaun sira husi país amigu sira ne'ebé iha lasu istoriku no kooperasaun nian, nune’e Timor-Leste sente triste tebes.

“Ami hato'o ami nia sinséra solidariedade ba Primeiru-Ministru Narendra Nodi no povu indianu no mós ba familia sira husi vitima hotu husi trajedia ne'e,”dehan komunikadu ne’ebé Online ne’e sita, sesta ne’e (13/06/25).

Enkauntu, iha aviaun laran iha ema na'in-242  kompostu husi pasajeiru na'in-230 no tripulante na'in-12, ho nasionalidade oioin, ne’ebé inklui sidadaun indianu na'in-169, sidadaun britániku na'in-53, sidadaun portugés na'in-hitu no sidadaun kanadianu na'in-ida.

“Governu Timor-oan lamenta tebes ho ema sira ne’ebé mate no hato'o sentidu kondolénsia ba família vítima sira hosi asidente trájiku ida-ne'e, ne'ebé sai hanesan epizódiu ida ne'ebé aat liu iha aviasaun sivíl iha dékada sira ikus ne'e,”tenik komunikadu refere.

Ho nune’e, Governu Timor-Leste manifesta nia solidariedade ba Governu no povu Índia, iha tempu lutu koletivu ida-ne’e, no hato’o mós solidariedade ida-ne’e ba Governu Reinu Unidu, Portugal no Kanadá nian, ne’ebé ninia sidadaun sira mós mate iha trajédia ida-ne’e.