Ministru Obras Públikas, Samuel Marçal afirma, atividade ne’e hanesan projetu pilotu ida atu demonstra efikásia utilizasaun fibra iha mistura material konstrusaun sira.

“Atividade ida ne’e hanesan atividade pilotu ida hodi demonstra sistema ba uza fibra ho maneira ida, atu bele kahur hamutuk ho materiál konstrusaun seluk hanesan simente, rai-henek no krikil hodi bele fó kualidade ida forte durante implementasaun,” Dehan Ministru Samuel liu husi diskursu,  bainhira hala'o Inagurasaun estrada rural, iha Suku Railaku Kraik, Postu Administrativu Railaku, Munisípiu Ermera, Kinta (11/06).

Ministru esplika, Governu mós sei uza sistema ne’e iha área 10 iha territóriu nasionál ho orsamentu ne’ebé Governu iha.

“Husi rezultadu hosi projetu pilotu iha Ermera sei sai referénsia importante ba expansaun teknolojia FRC ba munisípiu seluk iha Timor-Leste, tanbá ne'e Governu liu husi Ministériu Obras Públikas prepara ona planu, atu implementa téknolojia hanesan iha munisípiu 10 iha nasaun tomak hodi fortalece konetividade rurál no apoia kresimentu ekonomia lokal,” Nia relata.

Iha fatin hanesan, Embaixadora Austrália iha Timor-Leste, Caitlin Wilson, mós hatutan, kompromisu Austrália atu kontinua apoia dezenvolvimentu infraestrutura ne’ebé reziliénte no sustentável iha Timor-Leste.

“Governu Austrália sente orgullu parseria ho Governu Timor-Leste hodi entrega estrada ne’ebé reziliénte ba klima. Liuhusi introdusaun téknolojia FRC, ita harii infraestrutura ne’ebé dura, ne’ebé garante asesu seguru no konfiável liu ba komunidade lokál sira, maski durante kondisaun tempu ne’ebé estremu,” Nia haktuir.

Tanbá da-daun ne'e projetu ho teknolojia FRC rasik implementa mós iha Postu Administrativu Maubisse, Munisípiu Ainaru.

“Tuir planu sei finaliza iha tinan ida ne'e ho Orsamentu ba Projetu Pilotu FRC iha Ralaku no Maubisse rasik ho montante kuaze miliaun $1,”Embaixada relata.

Iha sorin seluk, Xefe Suku Lihu, Bernardo do Santos Babo mós agradese bá Governu Australia nia apoiu liu husi partisipa hamutuk ho MOP bele lori ona estrada ho kualidade di'ak ba komunidade iha area rural.

“Estrada ne'e luan no bele fasilita movimentu komunidade sira husi suku ida ne'e ba to'o suku sira seluk inklui Munisípiu Aileu, nune'e mós Likisá ne'ebé hela besik area Railaku mós prefere liu husi ne'e, tanbá ba Aileu lá presiza kona Dili,” Nia informa.

Iha tempu hanesan, Nain ba Kompañia Lokal Doben Unipessoal Lda, Francisco de Jesus hato'o sentimentu orgullu, tanbá bele hola parte iha projetu ho téknolojia foun hanesan FRC.

“Projetu ida ne'e lá hanesan ho estrada bain-bain, tanbá uza beton, sira nia sistema teknolojia foun bá estrada nian ne'e di'ak, enjeñeiru sira dehan ida ne'e sei dura ba tempu naruk, ami hanesan emprezariu lokal prontu la tuir kontratu ne'ebé mak asina ona,” Nia hakotu.

Entretantu, projetu ne’e envolve reabilitasaun no manutensaun estrada ho distánsia kilometru 6, entre suku Lihu no Railaku Kraik, nune'e  finansia husi parseria Governu Austrália ho apoiu hosi programa PARTISIPA ho Orsamentu montante $454.260,94, hodi introdús téknolojia estrada reziliénte bá klima iha Timor-Leste.