Ministru Prezidensia Konsellu Ministru, Hermenegildo ‘Agio’ Perreira hatete, diploma ne’e  kria subsídiu moras nian, hodi garante traballadór sira ne'ebé rejista iha rejime kontributivu iha direitu ba benefísiu garantia sosiál ida ne'ebé substitui parsialmente rendimentu ne'ebé lakon iha kazu inkapasidade temporáriu ba serbisu.

"Konsellu Ministru eside dekretu lei hodi aprova kriasaun subsídiu moras nia, kontestu rejime kontribuitivu seguransa sosiál nia ne'ebé trabalhador sira kontribui, subsidiu ne'e moras nia, ne'ebé kuandu trabalhador sira moras karik sira iha direitu simu subsidiu durante tempu ne'ebé sira moras", dehan Ministru Agio Perreira, iha Palásiu Governu, Kuarta (01/10).

Nia dehan , medida ne'e hakarak atu hametin protesaun sosiál iha situasaun sira moras nian, hamenus dezigualdades entre setór públiku no privadu sira, no mós evita kustu adisionál sira ba entidade empregadór sira, hodi prevene risku hosi aumentu dezempregu.

Ministru Agio esplika, subsídiu moras nian ne’e sei atribui tuir rekerimentu, bazeia ba sertifikasaun médika ne'ebé fó sai hosi Servisu Nasionál Saúde, no nia valór sei korresponde ba persentajen ida hosi saláriu referénsia nian, hosi 60% to'o 80% depende ba durasaun inkapasidade nian.

"Períodu másimu subsídiu nian mak loron 120, no bele extende to'o loron 365 iha kazu sira moras grave nian ne'ebé komprovada," nia dehan.

Agio adianta, ho aprovasaun hosi diploma ida-ne’e, Governu hakat tan pasu ida iha prosesu habelar neineik rejime kontributivu seguransa sosiál nian, hodi kumpre Konstituisaun no kompromisu sira ne’ebé halo ona iha Programa Governu Konstitusionál  IX no Estratéjia Nasionál Protesaun Sosiál.