Tuir komunikadu ne’ebé Online INDEPENDENTE hakuir, sorumutu ne’e halo parte iha Despaxu Ministru Prezidénsia Konsellu Ministrus nian n.º 01/M-PCM/III/2026, loron 12 fulan-marsu, ne’ebé dezigna pontu fokál nasionál sira ba setór komunikasaun no informasaun iha kontestu ASEAN, no mós define sira ida-idak nia responsabilidade ba koordenasaun, artikulasaun institusionál no akompañamentu ba serbisus iha ámbitu mekanizmus rejionais.
Entre pontu prinsipál sira ne'ebé aborda mak aprezentasaun no koordenasaun estrutura AMRI nian, no mós nia pontu fokál sira, iha kuadru hosi ninia mekanizmus funsionamentu nian. Iha kontestu ida-ne’e, aborda mós grupu traballu prinsipál sira ne’ebé relasiona ho AMRI, liuliu iha nivel Sorumutu Funsionárius Importantes ne’ebé Responsavel ba Informasaun (SOMRI) no ninia subgrupu tékniku sira, inklui área sira ne’ebé dezenvolve konteúdu, radiodifuzaun dijitál, literasia mediátika no kombate ba dezinformasaun (informasaun bosok). AMRI hala’o sorumutu nivel ministeriál ho karater periódiku, ho serbisu tékniku ne’ebé SOMRI prepara, iha kuadru estrutura institusionál ASEAN nian.
Aleinde ne’e, halo identifikasaun no análize ba dokumentu orientadór prinsipál sira ba setór ne’e, liuliu planu estratéjiku sira ASEAN nian iha pilár sósiukulturál, dokumentus enkuadramentu AMRI no SOMRI nian, no mós inisiativa no planu asaun sira ne’ebé la’o hela iha área komunikasaun no informasaun.
Nune’e mós fó énfaze ba importánsia atu garante aliñamentu institusionál Timor-Leste nian ho instrumentu sira-ne’e, atu nune’e bele garante partisipasaun ida ne’ebé ativa, koordenada no konsistente iha servisus rejionais. Mekanizmu AMRI nu’udar parte hosi estrutura governasaun ASEAN nian iha Pilar Sósiukulturál no hatán ba Konsellu Komunidade Sosiokulturál ASEAN nian no mós ba Simeira ASEAN, nu’udar instánsia aas-liu.
Purtantu, Ekipa pontu fokál sira ne’ebé dezignadu inklui dirijentes no téknikus husi Prezidénsia Konsellu Ministrus, Sekretaria Estadu Komunikasaun Sosiál, Tatoli – Ajénsia Notisioza Timor-Leste, no Rádiu no Televizaun Timor-Leste, mak iha kompeténsia atu asegura koordenasaun téknika no artikulasaun interinstitusionál.
Nune’e mós akompañamentu implementasaun desizaun, programa no projetu sira ne’ebé aprova ona iha ámbitu mekanizmus ASEAN nian iha área komunikasaun no informasaun, inklui relatóriu regulár ba entidade kompetente sira kona-ba dezenvolvimentu atividade no kompromisu sira ne’ebé asume ona. Iha nivel nasionál, dezenvolve ona inisiativa sira preparasaun institusionál nian iha setór informasaun, inklui asaun sira formasaun no reforsu kapasidades téknikas ni’an.