WFP apoiu Ministériu Administrasaun Estatal (MAE) no Ministériu Edukasaun (ME) fornese foos tonela 330, ba eskola 350-resin ba Muisípiu (4) kompostu Munisípiu Lautém, Aileu, Kovalima no Dili.

Embaixadór Japaun mai Timor-Leste, KIMURA Tetsuya, hatete, apoiu ida ne’e nu’udar komprimisiu Governu Japaun nian hodi apoiu saúde no dezenvolvimentu labarik sira-nia iha Timor-Leste.

"Ami espera katak foos ne'e sei fó enerjia ba labarik sira nia kresimentu saudável no bele hetan susesu iha akadémiku, tanba ne'e, ami hein katak fornesimentu foos ne'e sei promove kustume han neʼebé saudável no koñesimentu ba labarik sira iha Timor-Leste atu hadi'a sira-nia isin-lolon no kakutak," informa Embaixadór Japaun mai Timor-Leste, KIMURA Tetsuya, ba jornalista sira iha Otél Timor, sesta (21/11).

Diplomata ne'e aprofunda, orsamentu ho montante rihun $700.000 no fos tonela rihun 330, sei kobre ba labarik liu 100,000 hodi hadi’a sira nia nutrisaun liu husi merenda eskolár.

"Ho Ajudus ida ne'e ita bele hadia di'ak liu tan nutrisaun ba labarik sira, hodi sira bele aprende ho di'ak liu tan,no ami fiar Katak apoiu ne'e hanesan esforsu ida ba longo prazu nian,"  dehan KIMURA Tetsuya esklarese.

Iha fatin hanesan Ofisiál WFP iha Timor-Leste, Amin Said, haktuir, importánsia husi kontribuisaun ne'e nia aliñamentu ba prioridade nasionál sira.

"Ami agradese tebes ba apoiu Japaun nian ba hahán no apoiu ida ne'e hatán diretamente ba prioridade Governu Timor-Leste nian atu asegura katak labarik ida-idak iha asesu ba hahán nutritivu durante tinan eskola nian, hodi ajuda sira aprende sai bo'ot, no hetan susesu, tanba ne’e WFP servisu hamutuk ho Ministériu Administrasaun Estatál no Ministériu Edukasaun hodi kontinua hametin sistema nasionál merenda eskolár," nia esplika.

Amin Said dehan, hahan mak investimentu importante ida iha kapitál umanu Timor-Leste, ajuda hamenus hamlaha, hadi'a nutrisaun, no suporta prezensa eskola nian no apoiu Japaun nian hodi reforsa esforsu nasionál sira atu proteje labarik sira nia saúde no moris di'ak no hametin reziliensia sistema hahán eskola nian.

Nia hatutan, WFP iha komprimisiu atu servisu hamutuk ho governu Timor-Leste no parseiru dezenvolvimentu sira atu promove seguransa ai-han no nutrisaun, hodi kontribui ba objetivu dezenvolvimentu ba tempu naruk iha nasaun ne'e.

Entretantu Ministra Edukasaun, Dulce de Jesus, hato'o agradesimentu ba Governu Japaun nia investimentu estratéjiku, atu asegura katak labarik hotu-hotu iha asesu ba hahán nutritivu sira ne'ebé suporta sira-nia aprendizajen no kreximentu.

"Lori Governu Timor-Leste nia naran hato’o ami nia agradesimentu profundu ba governu Japaun ba investimentu estratéjiku ida-ne’e hamutuk $700.000 ba aprovizionamentu foos, atu haburas joven liu 100,000 nia hanoin no hametin fundasaun sira hosi ami nia programa nasionál alimentasaun eskolár iha 2026," dehan ministra Dulce.

Governante ne'e rekoñese, Programa Mundiál Ai-han Nasaun Unida nian ba ninia parseria no dedikasaun ne’ebé kontinua atu hadi’a seguransa ai-han no nutrisaun iha Timor-Leste, hahú husi tinan 2005 ho programa merenda eskolár no governu sai na’in ba Merenda Escolar iha tinan-2011.

"Nune'e ita servisu hamutuk atu halo diferensa tanjivel ba ita nia oan sira nia moris, husik momentu ida-ne'e fó hanoin mai ita katak kolaborasaun maka xave ba progresu. Ho apoiu husi ita-nia parseiru sira no kompromisu husi ita-nia governu, ita sei kontinua serbisu la kolen atu asegura katak laiha labarik ida mak husik hela iha kotuk," nia konklui.