Tuir komunikadu ne’ebé Média INDEPENDENTE asesu husi Gabinete Ministru Prezidénsia Konsellu Ministru katak preparasaun planu ne’e tuir konkluzaun husi Relatóriu Monitorizasaun Progresu husi Planu Estratéjiku Dezenvolvimentu (PED) 2011-2030, ne’ebé aprezenta ba Konsellu Ministru iha loron 4 fulan-Marsu 2026, no hakarak atu orienta faze finál husi implementasaun PED.
“Agora daudaun, Unidade Planeamentu Integradu lidera no koordena serbisu tékniku ba dezenvolvimentu Planu Médiu Prazu nian, ho envolvimentu hosi entidade governamentál oioin. Kona-ba setór Kuadru Institusionál, serbisu ne’e lidera husi Ministru Agio Pereira, iha koordenasaun ho Ministériu Interiór, Ministériu Administrasaun Estatál, Ministériu Finansas, Ministériu Justisa, Ministériu Defeza, Ministériu Negósiu Estranjeiru no Kooperasaun, no Komisaun Funsaun Públika,” Sita komunikadu.
Hanesan parte ida hosi prosesu ida-ne'e, UPI foin lalais ne'e hala'o workshop ida ho instituisaun governu nian sira hodi fahe mata-dalan sira no halibur kontribuisaun sira ba dezenvolvimentu planu nian. Prevee mós reuniaun téknika ida ba loron 23 no 24 fulan-marsu, ne’ebé promove hosi Ministériu Planeamentu no Investimentu Estratéjiku, ho objetivu atu analiza, harmoniza, no konsolida kontribuisaun sira ne’ebé hato’o hosi liña ministeriál oioin, atu nune’e bele garante aliñamentu estratéjiku no konsisténsia informasaun nian.
Iha relatóriu monitorizasaun progresu PED 2011–2030 analiza progresu husi alvu 199 ba tempu badak no médiu.
Husi alvu 199 ne’ebé distribui iha setór lima: Kapitál Sosiál, Infraestrutura, Dezenvolvimentu Ekonómiku, Kuadru Institusionál, no Vizaun Makroekonómika. Ida-ne'e identifika progresu ne'ebé atinji entre 2011 no 2024, dezafiu estruturál sira ne'ebé persistente, no prioridade sira ba asaun to'o 2030.
Iha setór Enkuadramentu Institusionál, husi alvu 44 ne’ebé identifika, neen mak kompleta ona, 27 hatudu progresu avansadu, no 11 hatudu progresu parsiál, laiha alvu ne’ebé hatudu progresu.
Iha sorumutu ne’e, Ministru Agio Pereira hetan akompañamentu husi ekipa téknika husi Prezidénsia Konsellu Ministru, ne’ebé kompostu husi Konselleira prinsipál Gabinete, Ika Moniz, Diretór-Jerál Administrasaun, Pedro Feno, Diretór Nasionál Administrasaun, Finansas no Patrimóniu, Nelson Maria dos Santos Menezes, Koordenadór Gabinete ba Dezenvolvimentu Públiku, Sarmento Nasília Koordenadór Gabinete Planeamentu, Edinho Gonzaga Soares, no Xefe Gabinete Vise-Ministru Asuntu Parlamentár, Sanio Fernandes.