Tuir komunikadu ne’ebé online INDEPENDENTE asesu katak, Institutu Politékniku Timor-Leste, ne’ebé habadak ho naran IPTL, hodi troka atuál Institutu Politékniku Betanu, hodi fó karater nasionál ba estabelesimentu ensinu superiór foun.

Nune’e, Órgaun ein-ezersísiu, rekursus umanus dosentes no la dosentes no patrimóniu Institutu Politékniku Betanu nian nafatin la altera, atu nune’e bele garante kontinuidade institusionál no funsionamentu eskola superiór sira ne’ebé funsiona dezde tinan 2017, sein prejuizu ba kriasaun unidades orgánikas foun.

"IPTL sei iha sede iha Betanu, no ninia jestaun administrativa no akadémika bele inklui eskolas superiores iha munisípiu sira seluk. Kondisaun adekuadu sira iha ona hodi garante dezlokasaun husi órgaun kompetente sira, hodi asegura jestaun ida ne’ebé efisiente ba ensinu superiór tékniku," Online INDEPENDENTE sita iha komunikadu, Kuarta (09/07).

Enkuantu, komunikadu ne’e haktuir, diploma ne’e mós determina katak Institutu foun ne’e mantein akreditasaun institusionál ba tinan lima ne’ebé fó husi Ajénsia Nasionál ba Avaliasaun no Akreditasaun Akadémika, I.P. (ANAAA) ba Institutu Politékniku Betanu, tuir termu Diploma Ministeriál nú 11/2023, loron 19 fulan-abríl, la ho nesesidade atu adota rejime instalasaun ka períodu tranzitóriu ida.