Diretór Interinu FONGTIL, Inocêncio de Jesus Xavier hatete, loloos governu labele tetu tan ona kooperasaun kontinuasaun ho kompaña refere, maibé loke oportunidade ba investidor seluk ne’ebé iha duni kapasidade no kompromisu.
governu iha planu foun karik halo kontratu ho kompañia seluk ne'ebé iha kapasidade, la'ós reve ho kompañia ida ne'ebé iha ona fallansu boot.
"Kompañia ida-ne'e di'ak liu lalika ona, tanba nia inkomprimentu tiha ona ba ninia kontratu, andamentu prosesu tempu prazu tiha ona, tanba ne'e mak lalika revé, karik atu kontinua halo ho kompañia seluk, tanba nia laiha kapasidade atu investe.”
“Tanba ne'e mak ha'u hanoin Pelican Paradise, liu-liu kompaña ne'e haluha tiha, tanba durante tempu naruk la halo buat ida, ne'ebé ha'u hanoin iha planu foun ho kompañia foun lalika tan ona ho kompañia ida ne'e, kompañia ne'e mai bosok ita tan, dala-ruma kompañia ne'e la'ós mai investe, atu mai esplora tan ita mak iha," dehan Inocencio iha Faról, Segunda (19/01).
Tuir nia, estadu TL tenke iha pesu no kualidade iha poder atu regulariza kompaña sira ne'ebé iha kontratu.
"Sim, ita na'in rua parseiru mais o kontra prinsípiu ida ne'e mak to'o tempu o la kumpre ita na'in rua laiha ligasaun ona, par atu hatur katak ita estadu ne'e iha pesu, labele kompañia mak mai volante fali ita," katak nia.
Ba FONGTIL, Pelican Paridise bele sai ezemplu ba kompaña sira seluk. Kada kompaña, tantu nasional ka internasional, ne’ebé viola kontratu sein justifikasaun tenke aplika sansaun, inklui blacklist.
Molok ne’e, iha 04 Juñu 2025, Ministru Planeamentu Investimentu Estratéjiku (MPIE), Gastão Sousa, rekoñese Pelican Paradise la'o kle'ur demais no daudaun ne'e iha faze diskusaun hodi foti desizaun ruma.
"Projetu ne'e kleur duni, hahú kedan Governu dahaat investimentu ne'e la'o ona maibé seidauk iha mudansa ho atividade ruma iha ne'ebá, maibé ita sei haree hodi halo diskusaun entre ami, liu-liu Ministru Asuntu Ekonómiku. Ha'u rasik atu haree didi'ak tanba sira iha rekezitu balun neʼebé Governu tenke ajuda, ida ne'e mak sei iha diskusaun," dehan Ministru Gastão.
Kona-ba ezijénsia ne'ebé antes ne'e Pelican Paradise husu ba Governu atu instala bee no eletrisidade, nia dehan, Governu realiza ona.
"Ami agora iha koordenasaun ida neʼebé di'ak tebes kona-ba aluga rai nian.Grupu interministerial ida neʼebé mai haree asuntu ida ne'e ho kle'an atu kontinua nafatin ou iha fali investór seluk ruma hakarak investe fali bele.Maibé ida ne'e ami sei haree,” dehan nia.