Akordu ida ne’e ofisialmente asina husi Diretor Ezekutivu FDCH, Júlio Aparício, hamutuk ho Vise-Reitor Asuntu Akadémiku, Peskiza no Inovasaun Universidade São José Macau, Alexandre Lobo. Asinatura ne’e mós akompaña husi Ministru Planeamentu no Investimentu Estratéjiku, Gastão de Sousa.

Objetivu prinsipal husi kooperasaun estratéjika ida ne’e mak atu loke dalan no fasilita prosesu ba bolseiru Timoroan sira ne’ebé hetan fundu husi FDCH, hodi bele hala’o estudu iha Universidade São José Macau ho maneira ne’ebé mais organizadu no efisiente.

Ministru Gastão dehan, nia sente orgullu bele sai sasin ba momentu importante ida ne’e.

Tuir nia, MoU ida ne’e la’ós de’it dokumentu formal, maibé hanesan ‘ponte’ ida ba dezenvolvimentu rekursu umanu Timor-Leste.

“Rekursu umanu mak ita nia rikusoin boot liu, no FDCH nia misaun mak loke dalan ba potensial ne’e. Universidade São José, hanesan instituisaun respeitadu iha Macau, iha papel importante atu hamutuk ho ita,” dehan Ministru ne’e.

Nia subliña, kooperasaun ida ne’e sei loke oportunidade konkretu ba estudante Timoroan sira atu bele estuda iha Macau, sidade ida ne’ebé liga kultura Portugal no Xina, no sai hanesan pontu enkontru ba mundu rua.

Tuir Ministru, kolaborasaun ida ne’e la’ós foka de’it ba asisténsia téknika, maibé mós atu reforsa relasaun amizade no dezenvolvimentu entre instituisaun rua ne’e.

Nia konsidera akordu ida ne’e hanesan kapitulu foun iha istória kooperasaun edukasionál entre Timor-Leste no Macau.

“Liu husi kooperasaun ida ne’e, ita espera estudante sira bele aproveita oportunidade atu aumenta koñesimentu, abilidade, no mós respeitu ba malu entre povu rua,” Ministu subliña.

Ho MoU ida ne’e, FDCH no Universidade São José Macau espera bele kontinua fortalese formasaun rekursu umanu Timor-Leste ba futuru ne’ebé liu husi edukasaun ho kualidade.