Portavós EUTL Natalizio Nunes Martins hatete, revogasaun lei pensaun mensal vitalisia ne’e povu mak luta, povu mak determina no povu mak manan, tan ne'e vitoria ne'e ba povu.
"Situasaun ne'ebé ohin loron ita akompaña iha ona rezultadu husi Parlamentu Nasionál, ita akompaña iha horiseik debate iha faze jeneralidade pasa ho projetu lei númeru 11/2025, ne'ebé atu halakon totalmente lei pensaun Mensal Vitalísia no ida ne'e ohin ita tama ba debate espesialidade, no deputadu sira iha parlamentu nasional vota a-favór ba lei ne'ebé atu revolga lei pensaun Mensal Vitalísia nian," dehan nia ba Jornalsita sira Parlamentu Nasionál, Sesta (26/09).
Nia dehan, ezizensia halakon lei pensaun mensal vitalisia ne’e, la’ós vontade deputadu sira nian no la’ós vontade Prezidente Parlamentu Nasional nian, maibé ne’e ejizensia povu nian ne’ebé hakarak duni atu Halakon LPMV. Iha informasaun sira ne'ebé dehan katak partidu ida nian ne'ebé EUTL konsidera nian falsa ka lalos.
“Halakon LPMV iha PN pasa ona, tan ne’e hein fali ba iha Prezidente Repúblika oinsa atu uza nia kompetensia tomak, nune'e bele promulga LPMV no ikus produz efeitu publika iha jornal Repúblika bele Halakon ka revoga ona LPMV atu nune’e ba oin ita dehan katak adeus lei pensaun Mensal Vitalísia no bemvindu bá Orsamentál Jeral Estadu. Ida ne’e mak povu nia hakarak, tanba ne’e mak ita husu halakon total Lei Pensaun Mensal Vitalísia," tenik Portavós.
Iha biban ne’e, Portavóz EUTL mós husu ba povu, estudante no kamada sosial sira hotu atu nafatin akompaña prosesu sira, tanba sei to'o iha rezultadu ida ne'ebé serteza, tanba rezultadu ikus sei publika iha Jornal Repúblika.
“Ita EUTL iha esperansa, povu tomak iha esperansa katak Prezidente sei uza nia kompetensia tomak atu deside tuir povu nia hakarak, ida ne’e mak ita bele dehan katak ba oin ita bele halo ona poupansa , maibé se Prezidente deside buat ne'ebé mak la tuir povu nia hakarak, ita sei hakdasak ho dezenvolvimentu ne'ebé labele dezenvolve ita nia nasaun ida ne’e, tanba ne’e husu Prezidente Repúblika promulga para hamate ona lei pensaun Mensal Vitalísia," Porta husu.
Nia salienta, ejizensia sira husi EUTL nian kona-ba sosa Kareta Luxo ba Deputadu sira iha ona rezultadu pozitivu, LPMV ba PN remata ona.
aleinde, ba Lei manifestasaun seidauk iha rezultadu, tanba ne’e EUTL sei hatama fali pedidu ba PN atu bele inisia ona debate ba alterasaun lei manifestasaun nian.
Entretantu, EUTL mós ezije nafatin ba PN bainhira halo debate ba OJE 2026 nian iha fulan Outubro tinan ne'e, tenki tau orsamentu ne'ebé ho pursentu boot bá iha setór produtivu sira.
Enkuantu, revogadaun ba LPMV iha final globál deputadu sira iha Parlamentu Nasionál fo votu a-favor 62 kontra 0 abstensau 0.