Diretór ESG 05 de Maio, Bekora, Julio Maia Castro de Jesus hatete, estudante desimu Segundo ano ne’ebé prepara atu tuir  ezame nasional hamutuk na’in 462.

Nia dehan, sala de aula ne’ebé estudante sira uza atu tuir ezame nasional hamutuk 13 no tuir nia aula ne’e sufisiénte ona.

“Iha eskola 05 de maio, total estudante ne’ebé prepara-aan atu tuir ezame nasional hamutuk na’in 462,”dehan nia ba Online INDEPENDENTE, iha nia knar fatin, ESG 05 de Maio, Kuarta (17/09/25).

Diretór eskola ne’e hatutan, pontus ba ezame nasional nian, eskola haruka ona ba iha Ministeriu Edukasaun no iha ona prosesu imprime.

“Pontus ezame iha ona, maibé ami seida’uk enkontru ho profesor sira, no semana oin mak ami bele enkontru no bele fó sai, agora ne’e profesores sira prepara atu fó esplikasaun klaru kona-ba ezame ne’e ba estudante sira,”tenik nia.

Dirijente eskola ne’e mós haktuir, professor sira ne’ebé atu halo vijilansia ba ezame nasional nian iha eskola refere hamutuk na’in 53 kompostu husi feto na’in 29 no mane na’in 24.

 Atu hasoru ezame nasional ne’e, Dirijiente eskola ne’e husu ba estudante sira atu haka’as-an estuda, nune’e bele partisipa iha ezame nasional ne’e ho di’ak.

“Ha’u sempre fó hanoin nafatin ba ha’u nia estudante sira,liuliu ba klase 3, Ha’u fó hanoin nafatin nu’udar eskola oan estuda nafatin, ne’e importante tebes, tanba futuru di’ak ka aat iha imi estudante sira nia liman, no husu nafatin ba estudante sira atu estuda di’ak liu tan atu bele hasoru ezame nasionál ne’e,”nia husu.

Entretantu, kandidatu estudante finalista na’in 462 husi ESG 05 de Maio kompostu husi CT na’in 229 ne’ebé iha feto na’in 133 no mane na’in 96, nune’e mós ba estudante CSH hamutuk na’in 233, fahe ba feto na’in 64 no mane na’in 169.