Embaixadora Xina hato’o pedidu ne’e iha enkontru tripartida ba dala tolu entre Embaixada Xina, Asosiasaun Emprezaria Xineza Timor-Leste no Komando PNTL, iha embaixada Xina, Sesta (16/01).

"Enkontru Tripartida ida ne'e hanesan hametin liu tan kooperasaun entre parte hotu-hotu.Ami konsidera katak ita-nia seguransa no estabilidade sosiál importante tebtebes ba empreza no komunidade Xineza ne'ebé halo negósiu iha ne'e," dehan Embaixadora Wang hafoin enkontru tripartida.

Embaixadora ne’e rekomenda ba  autoridade seguransa atu bele fokus ba projetu-investimentu sira ne’ebé fó kontribuisaun ba hadia povu nia moris, no atu hametin komunikasaun entre polísia komunitariu ho komunidade Xineza.

"Ita mós rekomenda katak ita-nia PNTL bele fó formasaun ba ita-nia traballadór sira ne'ebé servisu iha Timor-Leste no liu husi mekanizmu ida ne'e ami mós rezolve ona problema iha merkadu Maliana, tanba ami-nia komunidade xineza no Membru Asosiasaun Xineza nia komunikasaun ba Autoridade Seguransa PNTL ne'e importante atu sira bele moris ho seguru iha Timor-Leste,” katak nia.

Embaixadora ne’e mós hatutan, iha enkontru ne’e Komandante Jerál PNTL, Komisáriu Jerál Polísia Henrique da Costa, atualiza situasaun jerál iha Timor-Leste ne’ebé konsidera lao di’ak no povu hetan protesaun.

Nia mós hato'o prontidaun atu konstrui postu polísia iha merkadu Maliana.

Iha biban ne'e, Embaixadora mós hato'o katak membru sira husi empreza no asosiasaun Xineza sira iha Timor-Leste mós konkorda katak sei mantein komunikasaun ho PNTL.

Jeralmente, nia dehan, organizasaun no asosiasaun Xineza siira iha Timor-Leste konsidera situasaun iha Timor lao di’ak.

"Ami mós rekomenda, fó hanoin ba ami-nia komunidade Xineza sira, hala'o sira-nia negósiu iha Timor-Lestetenke  tuir lei ne'ebé iha, respeitu ita-nia lisan no kultura Timor-Leste ninian, no integra komunidade sira-nia aan iha komunidade Timor-Leste hodi fó apoiu ba moris Timor-Leste nian," katak nia.

Iha fatin hanesan, Komisáriu Henrique informa, enkontru ho Embaixadora Xina ne'e inisiativa husi Komamdu rasik.

"Enkontru ida ne'e hanesan tinan kotuk, ohin ita halo hanesan no ohin ne'e halo dala tolu ona, tanba ita hatene katak komunidade Xineza iha Timor-Leste ne'e barak i sira mai investe iha Timor-Leste i parte seguransa ita tenke garante katak sira nia fatin seguru sira-nia fatin be Investimentu ne'e sira-nia projetu sira-nia buat sira ne'e bele la'o ho seguru tanba ne'e ita halo enkontru ho sira ita hateten katak prezensa ita boot sira-nia iha Timor-Leste fó ninian kontribuisaun ne'ebé boot ba Timor-Leste ninian kria mós kampu traballu Timor oan sira", nia afirma.

Nia dehan, hanesan Autoridade Seguransa polísia sei garante seguransa la'ós de'it iha Timor oan, maibé ba sidadaun Xineza para sira sente seguru hodi nafatin investe iha Timor-Leste.

"Ita presiza kria komunikasaun ida ke di'ak para atu nune'e  hafasil sira hodi komunika mai iha polísia. Buat ne'ebé ita fahe mak ne'e ita fahe ba sira númeru emerjénsia númeru polísia ninian atu nune'e iha buat ruma kontaktu lalais ba iha polísia hodi nune'e polísia bele responde", nia afirma.

Komandante Jeral PNTL ne'e hateten, sei kria plataforma ida  atu nune'e iha situasaun saida de'it informasaun saida de'it polísia bele fahe informasaun ba komunidade Xineza iha bele asesu lalais.

"Sira husu para atu nunee polísia mós bele halo movimentu barak liu tan ba iha sira-nia loja sira iha tempu kalan tanba komesa loja barak mós ema nauk iha tempu kalan ninian hanesan iha Marliana ninian", dehan nia.

“PNTL sei intensifika atividade patrollamentu iha tempu kalan nune'e mós sei kompleta liu tan CCTV no husu ba Xineza ne'ebé mak halo halo negósiu iha Timor-Leste tenke monta CCTV iha sira-nia loja atu nune'e kuandu problema mosu ba sira bele serbisu hamutuk ho polísia  nune'e fasil rekolla gravasaun sira hodi halo analize atu nune'e iha informasaun polísia hodi haree hodi bele buka tuir suspeitu sira”, nia hakotu.