Komisaun ne’e lidera husi Komandante Jerál daruak PNTL, Komisariu Pedro Belo, ne’ebé iha tempu ne’ebá hala’o kna’ar nu’udar Prezidente Juri Komisaun Rekrutamentu.
Tuir Ministru, desizaun ne’e foti hafoin Ekipa Fiskalizasaun Rekrutamentu ne’ebé lidera husi Paulo Assis hetan indikasaun irregularidade iha prosesu selesaun.
“Komisaun rekomenda ona, ne'ebé ami sei halo investigasaun. Kuandu investigasaun ne'e mai, ita sei halo prosesu, ne'e depois mak ita haree,” dehan Francisco ba jornalista, sira iha Palásiu Governu, Kuarta (25/03).
Nia afirma, se iha prosesu investigasaun mak identifika iregularidade balun, kazu ne’e sei prosesa ba kriminál tuir prosedimentu ne’ebé iha.
“Se iha prosesu ne'e nia laran mak hetan buat ruma iha laran mak ita sei la'o tuir prosedimentu ne’ebé iha,” dehan nia.
Maski nune’e, Ministru seidauk bele konfirma prazu atu kompleta investigasaun ne’e.
Liu tan, nia dehan, governu la hanoin atu interfere demais iha prosesu rekrutamentu PNTL nian. Envezde, governu hakarak asegura katak instituisaun polísia ne'e bele hala'o prosesu rekrutamentu ho profisionál no independente.
“Ita lakohi polítiku mak kahur nia liman ba nafatin, tanba ne'e mak ita fó ba ne'ebá. Prontu, iha prosedimentu balun la loos ita kurize, hadia, par ita fó nafatin ba sira par aban-bainrua husik sira halo rekrutamentu,” dehan nia.
Tuir nia, pasu avaliasaun ne’e importante atu asegura katak membru PNTL ne’ebé rekrutadu iha duni kapasidade no méritu ne’ebé apropriadu, nune’e bele hasa’e kualidade servisu polísia nian iha futuru.
Governu hein katak, iha tinan hira tuir mai, PNTL sei bele jere totalmente prosesu rekrutamentu ho independente no profisionál sein presiza intervensaun.
Entretantu, bainhira Jornalista Jornal INDEPENDENTE koko konfirma asuntu ne’e ho Komisariu Pedro Belo, maibé Komisariu rekuza atu fó komentariu.
Enkuantu, Portavos Komisaun Rekrutamentu,Superintendente Xefe Polisia Antonio da Luz ne’ebé hetan mós konfirmasaun hatete katak nia parte laiha kompetensia atu koalia asuntu ne’e.
“Deskulpa, kona-ba ida ne’e ha’u laiha kompetensia atu esplika,” dehan nia ho badak.