Ministru Juventude, Desportu, Arte no Kultura, Nelyo Isaac Sarmento hatete, liu husi média sira, hakarak konvida ema hotu ne’ebe hakarak ba asiste abetura jogu CPLP hodi fó suporta ba ekipa selesaun nasionál ne’ebé sei kontra selesaun Portugal.

 “Iha loron 19 fulan ne’e, ita sei halo serimonia abertura, no iha momentu ne’e mos  sei hahu kedan ho abertura  jogu futeból entre Timor-Leste hasoru Portugal, tanba ne’e liu husi imi, ha’u konvida ema hotu atu  bele ba asiste jogu ida ne’e,” Dehan Ministru Nelyo, ba jornalista sira, iha kampu futsal Bebora, Kuarta (09/07).

Nia informa, familia sira ne’ebe hakarak ba akompaña jogu bele ba, tamba komisaun garante seguransa ne’ebé di’ak ba timoroan sira-ne’ebé hakarak ba asiste jogu.

Ministru Nelyo dehan, la’ós de’it jogu ne’ebe sei realiza iha estádiu munisipal Dili, maibe sei iha mos jogu seluk, hanesan jogu volibál praia, tenis kampu, jogu iha ginaziu, ne’ebe sei realiza durante semana ida resin.

“Tanba ne’e governu ita hotu atu mai akompaña, no suporta ita-nia ekipa no mos suporta membru pais sira ne’ebé mai jogu iha ne’e,”Nia husu.

Nia hatutan, nasaun ne’e sei to’o uluk iha Timor-Leste mak Guine Bissaun, parese loron 14 agora nia mak to’o uluk, restu ne’e sei to’o iha loron 17.

Nune’e, jogu desportiva CPLP sei hahu iha loron 17 to’o 27 fulan ne’e, atu dehan katak loron 17 membru pais sira foin to’o iha Timor-Leste no iha loron 18 komesa halo teknikal meeting, nune’e iha loron 19 hahu kompetisaun.

“Tanba iha eventu lubuk ida, aleinde de kompetisaun ita iha seminariu ba etika nian, forun juventude ni’an, no mos sei iha komferensia do Ministru, maibé kada loron sei iha orariu kompetisaun ba modalidade sira,”Nia esplika.

Purtantu, jogu CPLP sei partispa husi nasaun hitu (7) hanesan, Angola, Mozambique, Guine Bissau, Cabo Verde, São Tome e Prinsipe, Portugal no Timor-Leste ho total atleta hamutuk 512.