Xefe Jestaun Merkadu Munisipiu Dili, Joaquim Alves hatete, antes atu halo despezu adminitsrativu, ekipa konjunta fó ona notifikasaun ba komunidade afeitadu sira iha fulan fevereiru tinan ne’e.
“Iha fulan fevereiru,ami Autoridade Munisipiu Dili, hamutuk ho Xefe Suku no Xefe Aldeia fó ona karta notifikasaun, entaun iha sesta semana kotuk (11/07), ha’u simu ordem husi SEATOU, katak tuir lolos sobu iha iha sesta semana kotuk ne’e, maibé tanba ami uza fuan, nuudar ema umanu, ita sei tolera no fó tan loron tolu ba sira atu prepara no hasai sira nia sasan, no ohin ita realiza,”dehan nia ba Jornalista sira iha áredor Beto Barat, Suku Madohi, Tersa (15/07/25).
Xefe Jestaun Merkadu ne’e hatutan, negosiante baraka sia ne’ebé ekipa konjunta hasai sei la iha indimiziasaun, tanba sira okupa espasu públiku.
Nune’e, nia afirma, aban (16/07), nuudar loron ikus atu komunidade sira ne’ebé hetan ona notifikasaun atu bele hamamuk fatin refere.
“Ha'u sempre halo koordenasaun ho ekipa tekniku ho ami-nia superior hodi muda ba aban, aban ne'e ikus ona, ida ami sobu daudauk ne'e baraka, fatin ne'ebé maka sira uza halo negosiu ne'e hamutuk 9 no laiha indimizasaun,”tenik nia.
Iha fatin hanesan, Komunidade Afeitadu hanesan mós na’in ba Ofisina Stefano Sandor Auto Service, Armando Soare lamenta ho notifikasaun ne’ebé ekipa konjunta halo, tanba maske notifikasaun iha maibé la halo verifikasaun didiak.
Tanba ninia ofisina ne’ebé iha, durante ne’e fó servisu ba Timoroan sira no mós kontribui ona taxa ba estadu.
“Antes ne'e ami simu ona notifikasaun husi Autoridade Munisipiu Dili, notifikasaun ne'e mai maibé boot sira maka la mai tun direita hodi haree no verifika didiak, tanba sira lahatene katak iha ne'e uma permanente mós iha, aleinde ne'e mós ha'u iha fatin ofisina ba automotif nian no ha’u fó servisu ba Timoroan no kontribui ona taxa ba estadu,”liu-liu automotif mos iha, ha'u fo serbisu ba Timoroan no kontribui selu taxa ba Estadu,”haktuir na’in ba ofisina ne’e.
Ho nune’e, nia husu ba Governu bainhira halo eviksaun ruma no tenke halo koordenasaun diak ho komunidade sira.
“Kuandu halo eviksaun, primeiru mai verifika uluk lai, haruka ekipa tun uluk para foti dadus, tanba bai-bain SEATOU tun ne'e ho ekipa Terras Propriedades iha laran, Obras Públiku mós iha laran, atu mai sura uma sira ne'e, uma ne'e modelu hanesan ne'ebé, luan hira, uza saida, maibe ida-ne’e la’e, semana kotuk mai derepenti dei't atu sobu ona, entaun momentu ne'e ami komunidade maka la konkorda entaun sira fila, ohin ne'e maka sira obriga sobu dei't,”tenki komunidade afeitadu ne’e.
“Ami afeitadu, liu-liu ami-nia uma permanente ne'e, ami lamenta tebes ho Governu nia desizaun ne'e, tan ne'e husu ba Governu kompetente atu tun mai verifika lai, para fó serteza ba ami, tanba ami-nia uma permanente ne'e ami iha direitu”.
Entretantu, Xefe Suku Madohi Bernardino de Cristo Ferreira akresenta, razaun hasai komunidade afeitadu iha área beto barat, tanba komunidade hirak ne’e okupa espasu públiku no okupa áreador edifisiu husi CCLN ho MAKLN.
Nune’e, antes hasai komunidade hirak ne’e, ekipa konjunta ho autoridade lokal mós fó ona notifikasaun ba sira.
“Antes atu sobu, SEATOU liu-husi ami ne'e mos halo ona notifikasaun, no ami enkontru foin ba negosiante baraka sia no uma permante uma-kain tolu. Razaun hasai sira maka, primeiru atu halo alargamentu estrada, segundu tanba área ne’e edifisiu CCLN nian”hakotu Xefe Suku ne’e.