Koordenadór eskola, Joaquin Qintão hatete,eskola ne’ebé nia lidera laiha meza no kadeira ne’ebé sufisiente ba estudante sira.Maski nune’e, parte eskola tenta buka solusaun rasik hodi hatan ba nesesidade ne’ebé iha.

“Ami iha ne’e meza no kadeira la sufisiente ba estudante sira, maibé husi eskola ami hasai osan konsensaun eskolár hodi hola triplex no pregu atu hadia meza no kadeira,” hatete Joaquin ba jornalista Jornal INDEPENDENTE, via telefone, Segunda (02/03).

Nia esplika katak maske esforsu ne’ebé halo ona, meza no kadeira ne’ebé eskola prega seidauk sufisiente atu atende estudante hotu-hotu.

Aleinde fasilidade, kondisaun sala aula iha eskola ne’e mós preokupadu, tanba plafon iha aula hirak ne’e hahú dodok no fó ameasa mós ba estudante no manorin sira durante prosesu aprendizajen.

La to’o ida ne’e, EBF Bahasahe mós hasoru problema menus profesór. Daudaun eskola ne’e iha de’it profesór na’in 7, ne’ebé konsidera seidauk sufisiente atu hanorin estudante sira ho efetivu.

“Ida ne’e seidauk sufisiente atu hanorin estudante sira, tan ne’e ami sei presiza manorin na’in rua ka tolu,” nia akresenta.

Atu organiza prosesu aprendizajen, eskola uza sistema fahe tempu entre dader no loraik.Daudaun iha sala aula tolu, kada sala akumula estudante entre na’in 25 to’o 27. Parte dader ba estudante husi 1º to’o 3º ano, no parte loraik ba estudante husi 4º to’o 6º ano.

Koordenadór ne’e hatutan, parte eskola informa ona situasaun ne’e ba governu, maibé to’o agora seidauk hetan resposta konkretu.

Iha parte seluk, Diretór Servisu Edukasaun Munisipiu Baukau, Afonso dos Santos da Costa, konfirma katak problema hirak ne’ebé mosu iha eskola sira iha Baukau tau ona iha pedidu ofisiál atu submete ba ministeriu kompetente.

“Problema hirak ne’ebé mosu iha eskola sira iha Baukau, ita tau ona iha pedidu atu submete ba ministeriu, atu ministeriu tau iha prioridade hodi responde ba preokupasaun sira ne’e,” nia dehan.

Kona-ba menus manorin iha EBF Bahasahe, nia hatete, parte edukasaun tau ona kestaun ne’e iha prioridade.

Nia esplika mós katak durante loron hirak liu ba, Munisipiu Baukau hetan manorin foun hamutuk 122, ne’ebé sei distribui ba eskola sira ne’ebé menus forsa hanorin.