Nia dehan, iha ona planu atu halo rehabilitasaun ba semáfro no zebra kross sira, maske orsamentu la aprova, maibé liu husi esforsu Ministru Transporte no Komunikasaun, tinan ida ne’e, sei halo rehabilitasaun.

“Iha tinan ida ne’e, ita sei halo rehabilitasaun ba iha sinais semáfro sira no mós pinta fila-fali zebra kross ne’ebé marka tinta sira lakon hotu ona liu husi KAFI,”dehan  Diretóra Nasional Transporte no Tereste, Maria Antónia ba Jornalista Online INDEPENDENTE, iha nia knar fatin, DNTT, Balide, Dili, Sesta (20/06/25).

Nia hatutan, semáfro iha area Kolmera nian ne’ebé la funsiona kauza husi rehabilitasaun estrada sira.

“Iha parte Kolmera nian ne’e, tanba sira kee kanek tiha fiu sira ne’e, entaun nia implika ba iha funsionamentu sinais semáfro sira. Agora iha parte Balide nian, los duni ne’e ita haree tanba nia kleur ona no la funsiona tanba nia kontroler maka aat,”tenik nia.

 Nia akresenta, iha mós semáfro sira ne’ebé antes ne’e halo rehabilitasaun maka hanesan  iha área Timor-Plaza nian, Ai-Tarak Laran, Kolmera no Kaikoli, ho orsamentu ne’ebé gastu hamutuk rihun $800.

Entretantu, Diretóra Nasionál Transporte no Terestra afirma, orsamentu ne’ebé sei halo rehabilitasaun ba sináis semáfro no zebra kross sira iha Kapital Dili ne’e hamutuk milaun $4.