Xefe Governu konstitusional dasia hato’o kestaun ne’e relasiona ho preokupasaun balun ne’ebé mosu kona-ba dezeñu aeroportu ne’ebé governu konstitusional dasia prepara.

"Kestióna saida? tanba saida? la di'ak ga? dezeñu ladun di'ak, tanbasá mak la di'ak? la di'ak ne'e iha saida? Dezeñu anteriór ne'e di'ak liu, kapás tebe-tebes," dehan PM Xanana ba jornalista sira hafoin enkontru semanál ho PR Horta, iha Palásiu Prezidensiál Bairu-Pite, Kinta (22/05).

Xanana hatete, dezeñu ne’ebé uluk halo furak, maibé osan mak la to’o atu bele implementa.

"Dezeñu ida uluk ne'e par furak ida, osan mak la to'o ida. Dezeñu ida seluk ne'e furak atu mate, osan la to'o ne'e mak ami halo dezeñu aat ida, atu osan ne'e bele, tanba fundu petroliferu mós osan menus tiha ona," dehan nia.

Kona-ba lansamentu fatuk dahuluk iha 20 Maiu 2025 ne’ebé hamosu mós polemika tanba balun konsidera lansamentu fatuk dahuluk halo ona iha governu daualu, PM Xanana husu atu hatudu provas.

“Loron ida ointavo governu asina ne'e primeira pedra tiha ona? Hatudu to'ok primeira pedra ne'ebé, loron ida sira asina ne'e?,” dehan PM Xanana.

Molok ne’e, Eis Primeiru Ministru no atuál Sekretáriu Jerál Partidu Fretilin, Marí Alkatiri preokupa seriédade governu dasia ba implementasaun projetu aeroportu Komoro.

Tuir Alkatiri projetu ba aeroportu Komoro uluk iha governu daualu halo ona lansamentu fatuk dahuluk ne’ebé partisipa mós husi PR Horta.

"Agora ha'u rona fali Aeroportu ne'e primeira pedra fali, ne'e saida mak ne'e. Aeroportu mak ne'ebá duni, ema sira atu hari'i ne'e nafatin de'it, primeira pedra dala rua kedas, ne'e prepara ba halo saida ninian," dehan Alkatiri, liu husi konferénsia imprensa iha ninia Gabinete, Faról, Kuarta (21/05).