Tuir komunikadu ne’ebé online INDEPENDENTE asesu husi Média PNTL katak kazu ne’e deskobre hafoin komunidade sira hetan bebé nia isin mate ne’ebé la kompletu, tanba parte balun hetan husi asu han ona.

Kazu refere akontese iha loron 14 Juñu 2026 tuku 07:00 dader, komunidade sira ne’ebé deskobre bebe nia isin mate ne’e komunika kedas ba Polísia Eskuadra Maubisse. Ekipa polísia ba fatin hodi asegura evidénsia no transporta bebe nia isin mate ba Mortuáriu Hospital Referál Maubisse atu hein prosesu autópsia.

Nune’e, iha loron 15 Juñu 2026, PNTL Munisípiu Ainaro halo koordenasaun servisu eskuadra polisia Maubessi ne’ebé hodi realiza operasaun konjunta buka no identifika suspeitu sira ne’ebé envolve iha kazu ne’e.

Durante operasaun ne’e, forsa konjunta konsege identifika suspeitu ho naran inisial AMCS, tinan 18, ne’ebé hala’o hela tratamentu saúde iha Hospital Referál Maubisse.

Tuir rezultadu investigasaun inisiál, suspeita ne’e mak inan husi bebé ne’ebé hetan mate no soe iha área refere.

Hafoin halo prosesu identifikasaun no rekolla informasaun preliminár sira, autoridade sira lori suspeita ba Komandu PNTL Munisípiu Ainaro atu hala’o prosedimentu legal sira. Depois prosesu identifikasaun remata, suspeita ne’e fila ba nia hela-fatin, maibé sei nafatin iha observasaun no kontrolu autoridade kompetente sira enkuantu hein prosesu legal no desizaun hosi tribunal tuir lei ne’ebé vigora iha Timor-Leste.

Dadaun ne’e, PNTL Munisipiu Ainaru kontinua hala’o investigasaun atu apura faktu hotu-hotu relasiona ho kazu ne’e no garante katak prosesu legal lao tuir dalan ne’ebé loos no justu.