Xefe Governu dehan, la iha dúvida, ne’e hanesan momento-save ida iha Estado nia moris. Debate kona-ba instrumento ida, liuliu, jestaun finanseira, ho nia estratéjia ho eskolla polítikas ba país, iha exercício demokrátiku ida ne’ebé halo diskusaun  kona-ba eskolla hirak-ne’e.

“Ho sentido boot kona-ba dever ho responsabilidade mak ha’u mai dirije ba ilustre audiensia ida-ne’e atu apresenta Proposta Lei kona-ba Orsamentu Jerál Estadu ba  tinan 2026. Tanba razaun ida-ne’e, mak debate kona-ba Orsamentu Jerál Estadu la’ós de’it sura números. Ita mai iha-ne’e atu fó sentido ba números hirak-ne’e no atu simu responsabilidade kona-ba investimentos, investimentos ne’ebé atu kontribui lori hadi’a ita-nia povo nia moris, atu hakbiit no dezenvolve ho forma saudável, instruída no empreendedora,”dehan nia liu husi diskursu iha ambitu abertura ba debate Proposta Lei OJE 2026, iha PN, Kuarta (05/11).

Primeiru Ministru afirma liu tan, Governu mai iha PN atu implementa plano estratéjiku ida, ne’ebé trasa ona iha 2011, ho hanoin kona-ba kontinuidade iha polítikas, projetos ho reformas, tanba ida-n’e mak únika forma atu bele alkansa vizaun kona-ba dezenvolvimento nasional.

“Ita mai iha-ne’e atu servisu ba famílias timoroan tomak hahú husi agrikultores iha Maliana ba produtores kafé iha Ermera, husi jovem lisenciado iha Díli ba artezaun ka badaen iha Suai, husi feto ho mane peskador sira iha Ataúro, ba emprezáriu sira iha Baucau, to’o inan ida ne’ebé ko’us nia oan ba eskola iha Oe-Cusse Ambeno.

Enkuantu, orsamento ida-ne’e mak hanesan sira hotu ninia história mak história Timor-Leste nian, hodi harii sira-nia futuro.