Ministra Solidariedade Sosiál no Inkluzaun Verónica das Dores hatete, iha tinan 2025, INSS identifika benefisiariu balun ne'ebé simu subsidiu pensaun sosial, nune’e mós hetan tan pagamentu ba direitu hanesan hanesan funsionáriu públiku no veteranus.

"Nune’e INSS elemina tuir Dekretu-Lei lei nu.8/2024 de 24 de Janeiru primeira alterasaun ba Dekretu-Lei nu.53/2022, artigu 16 no 17 ne'ebé hatete katak, labele halo pagamentu ba benefisiariu sira ne'ebé hetan prestasaun rendimentu traballu nian ne'ebé integra iha sistema rejime kontribuitivu seguransa Sosial," dehan Ministra iha Salun MSSI Kaikoli, Kinta (13/03).

Governante ne'e hatutan, ho nune'e INSS elemina benefisáriu idozus no ema ho defisiénsia husi lista pensaun sosial hamutuk na'in 130 tanba sira simu ona salariu nudar funsionáriu públiku no benefisiariu sira ne'ebé simu subsídiu veteranus hamutuk na'in 542.

Enkuantu, tuir dadus ne'ebé iha, benefisiariu ne'ebé INSS elemina husi lista pensaun sosial mak hanesan, husi Munisipiu Aileu na'in 44, Ainaro na’in 42, Baucau na’in 86, Bobonaro na’in 45, Covalima na’in 31, Dili na’in 74, Ermera na’in 72, Lautém na’in 44, Likísa na’in 66, Manatuto na’in 45, Oekusse na’in 40 no Vikeke iha na’in 41.

Entretantu, benefisiariu pensaun sosial ba tinan 2025 hamutuk na'in 107.786 ne'ebé kompostu husi idozus na'in 97.359 no Ema ho Defisiénsia na’in 10. 427.