Rúsia haree vizita ne’e nu’udár pasu importante ida atu hametin relasaun ekonómika no parseria estratéjiku ho nasaun membru ASEAN sira.

“Ami hakarak hato’o bemvindo ba Primeiru Ministru Timor-Leste nian iha ne’e. ami kontente ho ita boot nia prezensa iha ne’e. Espera  ita bele hametin liutan relasaun iha futuru,” Xefe Repúblika Tatarstan, Rustam Minnikhanov hateten durante almosu hamutuk iha sidade Kazan, kuarta (18/06).

Iha fatin hanesan Primeiru-Ministru, Xanana Gusmão agradese bá apresiasaun no sentidu fraternidade hosi autoridade sira no mós povu Repúblika Tatarstan nian ne’ebé simu delegasaun Timor-Leste iha eventu bo’ot ne’e.

“Lori Governu no povu Timor-Leste no mós ami nia delegasaun hakarak agradese ba buat hotu, liu-liu ami nia amizade no fraternidade. Agradese mós ba serimónia resepsaun ne’ebé oferese ba delegasaun. Primeira vez ami mai iha ne’e, ami mós iha esperansa katak ho ASEAN it abele hametin liu tan kooperasaun iha futuru,” PM Xanana informa.

Simeira Parseria no Komemorasaun Aniversáriu Relasaun ASEAN-Rúsia bá dala-35 ho nia fatin iha Sidade Kazan, Repúblika Tatarstan sei hala’o entre loron 17 to’o 19 Juñu 2026.

Prezensa PM Xanana Gusmão nian mós iha valór istóriku importante tanba konfirma Timor-Leste nia partisipasaun ativa nu’udár membru ASEAN iha habelar diálogu polítiku no kooperasaun rejionál ho Rúsia.