Tuir komunikadu ne’ebé Online INDEPENDENTE ases kuarta (17/06) katak Prmeiru-Ministru ho delegasaun to’o iha Aeroportu iha tuku 8:00 oras Rusia nian no serimónia simu ho parada hodi fó onra bá Xefe Governu hanesan mós Xefe delegasaun hosi Estadu-membru ida ASEAN nian.
Prezensa Xefe Governu Timor-Leste nian iha Rusia atu partisipa eventu Simeira Aniversáriu bá dala-35 Relasaun sira ASEAN-Rúsia nian, ne'ebé hala'o iha Kazan, Repúblika Tatarstan entre loron 17-19 fulan-Juñu tinan 2026.
Iha eventu ne’e, PM Xanana sei hamutuk ho líder sira hosi nasaun membru Association of Southeast Asian Nations no Prezidente Vladimir Putin atu diskute relasaun no kooperasaun entre ASEAN no Rusia.
Summit ASEAN–Rusia konsidera nu’udár plataforma importante atu hametin amizade, diálogu polítiku no kooperasaun ekonómika entre rejiaun Sudeste Ázia no Rusia.
Iha enkontru ne’e, líder sira sei aborda asuntu importante sira hanesan seguransa rejionál no globál, investimentu no komérsiu, enerjia, edukasaun, teknolojia, saúde públika, konektividade, infraestrutura no troka kultura.
Objetivu prinsipál hosi summit ne’e atu reforsa relasaun diplomátika entre ASEAN no Rusia, promove kresimentu ekonómiku hamutuk no kontribui bá manutensaun páz no estabilidade iha rejiaun.
Bá Timor-Leste, ASEAN kontinua sai plataforma estratéjika atu hasa’e ekonomia, dezenvolve kapasidade nasionál, hametin relasaun internasionál no asegura dezenvolvimentu sustentável.
Maski Timor-Leste kontinua integra-an iha atividade no diskusaun rejionál sira ASEAN nian hanesan parte hosi prosesu adezaun totál.
Durante summit ne’e, sei realiza mós sesaun painél no meza-redonda sira ne’ebé diskute parseria entre ASEAN no Eurasian Economic Union, inklui kriasaun espasu komérsiu no investimentu komún, kuidadu saúde, kooperasaun enerjia no indústria, dezenvolvimentu dijitál, inteligénsia artifisiál (AI), seguransa ai-han, no konektividade transporte no lojístika.
Integrasaun iha Eurasia sai mós tema importante iha fórum ne’e. Prosesu ne’e involve esforsu nasaun sira iha Europa no Ázia atu hametin kooperasaun ekonomia, polítika, seguransa no infraestrutura.
Organizasaun sira hanesan Eurasian Economic Union, Shanghai Cooperation Organisation no Belt and Road Initiative konsidera nu’udár ezemplu importante hosi integrasaun rejionál ne’ebé promove komérsiu, investimentu, konektividade no estabilidade.
Governu Timor-Leste haree esperiénsia integrasaun Eurasia nu’udár referénsia importante bá prosesu integrasaun rejionál iha ASEAN, liu-liu atu reforsa kooperasaun ekonómika no dezenvolvimentu nasionál.
PM Xanana akompaña hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministru Negósius Estranjeirus no Kooperasaun, Bendito dos Santos Freitas no Vise-Ministra bá Asuntus ASEAN, Milena Maria da Costa Rangel.