Treinadora Atletismu Portugal, Daniela informa, atletismu husi Portugal hamutuk atleta na'in 12, kompostu feto na'in 6 no mane nai'in 6, ne'ebe sei partispa modalidade atletismu nian.
Nia dehan, atleta sira-ne'e, maske sira nia idade joven, sira toman ona, atu kompete iha kompetisaun nasionál sira.
“Ida-ne'e maka dahuluk ba sira, barak atu kompete sai husi Portugál mai kompete iha kompetisaun internasionál sira, Ida-ne'e sai esperiénsia ida ne'ebé inkredivel tebes,” Dehan nia, ba Jornalista INDEPENDENTE, iha estádiu Munisipal Dili, Sexta (17/07).
Nia haktuir, atletismu sira kontente tebes ho atmosfera ne'ebé furak tebes, tanba sira hotu gosta tebes bainhira loron dahuluk iha Timor-Leste.
“Ami iha potensia ne'ebé barak, klaru katak atleta sira ho idade sira ne'e, sempre hakarak manán medalla sira, entaun faktu katak sira iha ne'e, iha kondisaun di'ak, ho mekanizmu di'ak ida ona,” Kata nia.
Nia informa, atleta sira sei kompete iha 100-metrus, 200-metrus, eventu 4x100-metru mistu, saltu dook,1500-metrus no 3000-metrus, no sei iha atleta ida ka rua iha eventu ida-idak.
Nia salienta, eventu ne'e hola parte mos iha atividade sira ne'ebé atu promove iha ambitu jogu CPLP, oinsa atu hametin lasu amizade, kultura, unidade entre nasaun sira ko'alia lian portugués.
“Ha'u hanoin importante tebes, no sente orgullu bele marka prezensa mos iha komunidade ida ne'e, tanba Timor-Leste hanesan esperensia foun ida ba ha'u, iha ne'e,” Nia espresa.
Nia mos agradese tebes ba sira nia federasaun desportu ne'ebé ajuda ona sira hodi realiza sira nia mehi iha Timor-Leste.
“Ha'u nia espetativa sira ba jogu sira-ne'e maka dahuluk, atu hetan belun foun sira no koñese kultura foun, oinsa atu estabelese rekorde pesoál ida no manán iha 100-metrus, hodi lori medalla ba ha'u nia rain no halo kontente ema hotu ne'ebé ha'u hadomi,” Nia akresenta.
Eventu nee, nia hakarak prinsipal liu mak atu koñese Timor-Leste, halo interasaun ho atleta sira seluk CPLP nian, oinsa atu fahe esperensia kona-ba istoria kultura sira.