Madre hatete, iha sosiedade barak dala-ruma tende atribui problema moral no komportamentu aat ba joven no labarik, maibé, tuir nia, realidade ne’e mak responsabilidade koletiva husi família, eskola, Igreja, no Estadu.

“Edukasaun tenke forma karater, la’os hanorin de’it lee ka hakerek. Edukasaun mós tenke inklui valores moral, espiritual no kultura,” dehan Madre Guilherminaiha konsultasaun públika revizaun Konstituisaun iha Salaun Katedral Bebora, Sesta (12/06).

Nia esplika, inan-aman mak fundamentu primeiru iha edukasaun oan sira nian.Se laiha akompañamentu di’ak husi família, labarik sira bele la hetan orientasaun ne’ebé loos no bele tama ba situasaun risku sosial, inklui krime.

Tuir nia, iha kazu menoridade envolve iha krime, importante atu la haree de’it husi aspetu lei, maibé mós husi fator psikolojiku no sosial, hanesan falta atensaun husi inan-aman no ambiente eskola ka komunidade.

“Bainhira labarik sira envolve iha krime, ita tenke haree oinsá sira moris no hetan akompañamentu. Dala-barak falta atensaun mak hamosu problema,” nia hatete.

Madre Guilherminamós husu atu fortalese kolaborasaun entre inan-aman, professor, Igreja no Governu hodi hasa’e kualidade edukasaun no valores moral iha labarik sira.

Nia sujere mós katak servisu reabilitasaun ba labarik sira ne’ebé iha problema tenke klaru objetivu no integra aspetu psikolojiku, moral no kultura, la’os de’it tratamentu parsial.

“Reabilitasaun tenke liga hamutuk, inklui moral, psikolojia no kultura. Governu bele suporta, maibé tenke iha planu hamutuk,” nia subliña.

Iha ninia apelu finál, Madre reitera katak prevene krime menoridade la’os responsabilidade ida de’it, maibé servisu hamutuk husi família, eskola, Igreja no Estadu atu forma jerasaun Timor-Leste ne’ebé responsavel no iha valores morais.