Kalbuadi ne’ebé hasoru-malu ho Prezidente Repúblika, José Ramos Horta, hatete, enkontru ho PR Horta ne’e sai oportunidade di’ak hodi relata no atualiza servisu governu nian
“Komesa tinan foun to'o agora foin iha oportunidade hasoru Prezidente Repúblika, ne'ebé primeiro, mai relata hela servisu ne'ebé agora atu hahú ba oin, noatualiza situasaun hotu-hotu,” dehan Kalbuadi iha Palasiu Prezidensia Repúblika, Bairo-pite, Kuarta (14/01).
Kalbuadi ne’ebé asume mós pasta nu’udar Ministru Koordenadór ba Asuntu Ekonómiku (MKAE), no Ministru Turizmu no Ambiente (MTA) hatete, nia parte mós agradese ba PR Horta, ne’ebé iha tinan 2025 halo kooperasaun lubuk ida ho MKAE no MTA.
“Liu husi desizaun Konsellu Ministru, liu-liu orientasaun husi Primeiru Ministru nian, atan-oan, ha'u, sei kontinua koopera nafatin ho ekipa Prezidensiál ba iha 2026,” dehan nia.
Vise PM ne’e esplika, programa governu nian ne’ebé aprova ona iha Parlamentu Nasionál (PN) sei kontinua lao nafatin, ho atensaun ba situasaun ekonomia nasional ne’ebé afeta mós husi kondisaun mundial atual.
"Tuir Primeiru Ministru nia orientasaun mai membru governu hotu-hotu katak, tinan ida ne'e tinan asaun, ne'ebé ami konsentra liu-liu ba atu dudu ekonómia ba oin. Ne'ebé ha'u-nia servisu mak ida ne'e, ha'u sei koordena nafatin ho ministériu sira seluk, liu-liu ba asuntu ekonómiku nian, agrikultura, telekomunikasaun, peskas, floresta nune'e mós ho área sira seluk,” dehan nia.
Molok ne’e, Primeiru Ministru, Kay Rala Xanana Gusmão apela bá ajente administrasaun estadu tomak atu kurize erru sira ne’ebé komete iha tinan 2025 nune’e bele hadi’a iha tinan 2026, no husu atu servisu ho responsabilidade hodi serví povu no rai ne’e ho di’ak liu tán.
“Tinan 2026 ne’e la’ós fásil bá ita. Tanba ne’e ita buka kurize nafatin atu povu fiar katak hetan tiha ukun-an, oan sira ne’ebé bá servisu hanoin netik sira-nia moris, hanoin netik rai ne’ebé ema rihun atus bá atus fó tiha sira-nia vida la husu buat ida.”
“2026 tinan mudansa, katak mudansa iha atitude, kompromisu no iha buat hotu-hotu nune’e povu bele sente katak sira-nia oan ne’ebé sai matenek, kaer servisu hanoin duni rai ida-ne’e, la’ós hanoin de’it sira-nia an no família,” dehan PM Xanana iha serimónia isar Bandeira Nasionál semana dahuluk fulan Janeiru 2026, iha Palásiu Governu, Segunda (05/01).